Libnan: Penaberên sûrî gurçikên xwe difiroşin

 

Hewlêr (Rûdaw) - Heta niha bi qasî yek milyon penaberên ji Sûriyê berê xwe dane Libnanê. Ji ber tinebûna derfetên kar û xizaniyê, gellek kes mecbûr dibin ku dest bavêjin çareyên xwe yên dawî, ew jî firotina laş û endamên laş in, ango firotina organên xwe.

Li gor raporteke kovara almanî “Der Spiegel“, hejmara penaberên sûrî ku ji ber xizaniyê amade ne gurçikên xwe bifiroşin, hewqasî zêde bûye, ku êdî buhayê gurçikan dadikevê. Di vê bazara reş de, ku di destê grûpên çete de ye, ji bo her gurçikekê 7000 Dolar tên dayîn

Mişteriyên van gurçikan pirranî kesên dewlemend yên ji welatên Kendavê ne, lê yên ji DYA û Ewropayê jî hene. Ev mişterî ji bo van gurçikan di navbera 12.000 û 15.000 Dolar didin. Li gor agahiyên ku yekî ji wan “navbeynkarên“ vê bazarê dane kovara Der Spiegel, ew bi xwe ji bo dîtina kesekî ku amade ye gurçika xwe bifiroşe, 600 heta 700 Dolar ji bazirganan werdigire.

Emeliyat di klînîkên bi dizî de

Li gor çavkaniya kovara Der Spiegel, derxistina gurçikan di klînîkên neyasayî de pêk tê û grûpa wî di sala borî de bi qasî 150 gurçik firotine mişteriyên dewlemend. Li gor texmînên pisporên bazirganiya organên laşên mirovan, salane li seranserê cihanê di navbera 5.000 û 10.000 gurçik bi rêyên neyasayî ji kesên xisan tên kirrîn û emeliyatî kesên dewlemend tên kirin.