SOHR: Tirkiyeyê depoyên genim û santralên karebayê bombebaran kirin
Hewlêr (Rûdaw) – SOHRê ragihand ku dronên Tirkiyeyê li bakurê Reqayê êrişî depoyên genim û santrala karebayê kiriye.
Rewangeha Mafên Mirovan a Sûriyeyê (SOHR), da zanîn ku dronên Tirkiyeyê doh li bakurê Reqayê sê caran êrişî depoyên genim ên Xatûniyeyê û santrala karebayê ya Cirniyeyê ya li gundewarê Tebqeyê kiriye.
Hat gotin ku ev êriş bûne sedema xisareke mezin a madî lê behsa ti xisarên canî nehat kirin.
Balafirên şer ên Tirkiyeyê 8ê vê mehê jî li nêzîkî gundê Gir Zîro yê Girkê Legê êrişî otomobîlekê û çend cihan kiribû.
Tirkiyeyê li çoltera Qamişloyê jî çend cih topbaran kiribûn.
Li gorî SOHRê, Tirkiyeyê ji destpêka îsal ve bi rêya dron û balafirên şer 18 caran êrişî deverên di bin kontrola Rêveberiya Xweser de kiriye.
Di van êrişan de 9 kesan canê xwe ji dest daye û 21 kes jî birîndar bûne.