Serokwezîrê Iraqê yekî ereb danî dewsa fermandeyê kurd

RÛDAW

 

Hewlêr (Rûdaw) – Serokwezîrê Iraqê û fermandeyê giştî yê hêzên çekdar ên wî welatî, Heyder Ebadî fermandeyekî ereb danî dewsa fermandeyê kurd ê artêşê Sefîn Mela Mecîd.

 

Roja 27ê Tebaxa îsal, fermandeyekî kurd ê artêşa Iraqê bi navê Sefîn Mela Mecîd, di encama êrişeke xwekujî ya DAIŞê de li nêzîkî bajarê Rumadî yê Iraqê şehîd bibû. Di wê bûyerê de fermandeyekî din ê artêşa Iraqê û 4 leşkerên iraqî jî hatibûn kuştin.

 

Serokwezîrê Iraqê Heyder Ebadî îro ragihand, li dewsa wî fermandeyê kurd, fermandeyekî ereb bi navê Mehmûd Fellahî daniye.

 

Ebadî her wiha da zanîn, li şûna fermandeyê din jî fermandeyekî bi navê Mecîd Hemîd Casim Fetlawî hatiye danîn.

 

Cenazeyê şehîd Sefîn Mela Mecîd duh li bajarê Hewlêrê hat veşartin.