Hewlêr (Rûdaw) - Dadgeha Bilind a Federal a Iraqê du giliyên ji bo hilweşandina Komîsyona Bilind a Hilbijartinan û Rapirsiyê ya Herêma Kurdistanê red kir û tenê daxwaz kir, peyvek di qanûna taybet bi avakirina wê komîsyonê bê guhertin.
Îro Duşembê 26ê Îlona 2022an, Dadgeha Bilind a Federal a Iraqê du giliyên ji bo hilweşandina Komîsyona Bilind a Hilbijartinan û Rapirsiyê ya Herêma Kurdistanê red kir, ku ji aliyê Serokê Fraksyona Nifşê Nû ya di parlamentoya Iraqê de û hejmarek parlamenterên wê fraksyonê pêşkêşî dadgeha navhatî hatibûn kirin.
Şêwirmendê qanûnî yê parlamentoya Kurdistanê, Wirya Seidî ku di civîna dadgehê de amade bû, ji Rûdawê re got, “Dadgeha Bilind a Federal a Iraqê bi du bendan biryar da her du gilî bên redkirin, ku di ya yekem de dibêje, qanûna Komîsyona Hilbijartinan û Rapirsiyê ya Herêma Kurdistanê li dijî detûrê nîne, û di benda duyem de jî dibêje, peyveke di nav qanûnê de ku taybet hatiye nivîsandin, were guhertin.”
Komîsyona Hilbijartinan û Rapirsiyê ya Herêma Kurdistanê li gor qanûna hejmar 10 a sala 2014 hatiye damezrandin û wê komîsyonê serpireştiya referanduma serxwebûna Herêma Kurdistanê ya di 25ê Îlona 2017an de kir.
Ev peyva ku dadgehê daxwaz kiriye ku were guhertin, di birgeya yekem a madeya 2 a qanûna komîsyonê de ye ku dibêje, komîsyon yekane desthilata taybet a lidarxistina hilbijartinan û rapirsiyan (referandumê) li Herêma Kurdistanê ye.
Şêwirmendê parlamentoya Kurdistanê herwiha da xuyakirin, “têbîniya derbarê wê birgeyê de ew e ku eger rapirsiyên Iraqê li Herêma Kurdistanê bên kiirin, desthilata taybetmend a ji bo sazkirina wê, komîsyona hilbijartinan û rapirsiyê ya Herêma Kurdistanê nabe, û dê komîsyona bilind a serbixwe ya hilbijartinên Iraqê dê wê saz bike, lewra jî ew peyv ji birgeya qanûna Herêma Kurdistanê dê were jêbirin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse