Rûmadî (Rûdaw)- Hêzên Iraqê ji sedî 70 ji bajarê Rûmadî yê parêzgeha Enbarê ji destê DAIŞê derxistine û tê pêşbînîkirin ku di demeke nêzîk de ew bajar bi temamî were kontrolkirin.
Serokê Civata Parêzgeha Enbarê Sebah Kerhut di daxuyaniyeke rojnamevanî de ragihand ku artêş û hêzên ewlekariyê li parêzgeha Enbarê bi giştî û bajarê Rûmadî bi taybetî berdewam di pêşveçûnê de ne û niha % 70 ji bajarê Rûmadî kontrol kirine.
Sebah Kerhut herwiha ragihand ku dezgeh Anti-Teror û polîsê federalî û eşîrên çekdar bi tevahî piştevaniya Artêşa Iraqê dikin û bi wê yekê jî ew serketinên mezintir bidest tînin.
Kerhut bal kişand ser wê yekê jî ku artêş û hêzên ewlekariyê yên Iraqê bi piştevaniya balafirên şer ên hevpeymanan roleke mezin di lawazkirin û dorpêçkirina DAIŞê de dibînin, lê hebûna bombeyên çandî bûye sedema sistbûna pêşveçûnên hêzên Iraqê.
Bajarê Rûmadî ku navenda parêzgeha Enbarê ye û piraniya xelkê wê parêzgehê sunî ne, niha hêzên Iraqê dixwazin wî bajêrî ji destê DAIŞê derxînin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse