Serokwezîrê Îraqê bangî gel kir: ‘Dakevin kolanan’
Hewlêr (Rûdaw) – Serokwezîrê Îraqê Mihemed Şiya Sûdanî ji ber êrişa ser Xezeyê, bangî gelê Îraqê kir ku dakevin kolanan.
Şava borî êrişî Nexweşxaneya El-Ehlê Baptîstê ya li Xezeyê hat kirin.
Di vê êrişê de herî kêm 500 Filistînî hatin kuştin, bi sedan kes birîndar bûn.
Serokwezîrê Îraqê Mihemed Şiya Sûdanî, bi rêya hesabê xwe yê Xê li ser vê mijarê peyamek belav kir.
Serokwezîrê Îraqê di peyama xwe de diyar kir ku êrişî gelê bêguneh ê Filistînê hatiye kirin û got:
“Divê li hemberî topbarankirina nexweşxaneyê hemû karmendên dewletê, xwendekarên zanîngehê, karmendên hemû sazî, dezgeh û dibistanan dakevin kolanan û xwepêşandanan li dar bixin”
Li Îraqê şîna giştî hat ragihandin
Berdevkê Hikûmeta Îraqê Basim Ewadî jî li ser “êrişên Îsraîlê” daxuyaniyeke nivîskî parve kir.
Basim Ewadî, da zanîn ku li Îraqê “3 roj şîna giştî” hat ragihandin.
Herwiha Basim Awadî bangî civakên navneteweyî kir û got, “Pêwîst e êdî Îsraîl dawiyê li çalakiya îmhayê bîne ku li bermaberî Filistîniyan daye destpêkirin.”
Li aliyê din êrişa li Xezeyê, li Bexdayê bi xwepêşandanan hat şermezarkirin.
Girseya ku li Meydana Tahirê kom bû, bi dirûşman ev êriş şermezar kir.