Enbar (Rûdaw)- Hêzên Iraqê li bajarê Rûmadî yê parêzgeha Enbarê ji 3 aliyan ve pêşde diçin. Herwiha herdu avahiyên Rêveberiya Çandiniyê û Dadgeha Rûmadî ji aliyê hêzên Iraqê ve hatine dorpêçkirin û tê pêşbînîkirin di çend seatên bê de bi temamî werin girtin.
Berdevkê Fermandehiya Operasyonên Parêzgeha Enbarê Ehmed Bîlawî ji Rûdawê re ragihand: “Herdu avahiyên Rêveberiya Çandiniyê û Dadgeha Rûmadî ji aliyê hêzên Iraqê ve hatine dorpêçkirin û tê pêşbînîkirin di çend seatên bê de bi temamî werin kontrolkirin.”
Ehmed Bîlawî wiha got: “Ez dikarim bêjin ji aliyê leşkerî ve herdu avahî hatine girtin, ji ber ku di bin agirê hêzên ewlehiyê de ne.”
Bi armanca kontrolkirina navçeya Telmişêd a başûrê rojhilatê bajarê Rûmadî hêzên Iraqê dest bi êrişê kirin. Îro hêzên ewlehiyê li aliyê rojhilat, başûr û bakur dest bi êrişê kirin.
Bîlawî derbarê şerê Rûmadî de wiha domand: “Hejmara mezin a bombeyên vedayî û xaniyên bombekirî sedemeke ku em bilez pêşde naçin. Herwiha ji ber ku gelek malbat li nava Rûmadî mane û DAIŞ rê nade wan ku derkevin.”
Bajarê Rûmadî ku navenda parêzgeha Enbarê ye û piraniya xelkê wê parêzgehê sunî ne, niha hêzên Iraqê dixwazin wî bajêrî ji destê DAIŞê derxînin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse