UNITAD: Me li ser sûcên DAIŞê 40 terabayt belge qeyd kirine
Hewlêr (Rûdaw) – UNITADê diyar kir ku wan li ser DAIŞê 40 terabayt belge qeyd kirine.
UNITAD (Tîma Neteweyên Yekbûyî ya Lêkolînên Tawanên DAIŞê) li ser kar û xebatên xwe yên li Îraqê daxuyanî da Rûdawê.
UNITADê da zanîn ku erkê wan ê li Îraqê dê li ser daxwaza Îraqê û bi biryara Neteweyên Yekbûyî 17ê Îlona 2024an biqede.
UNITAD ji sala 2017an ve li Îraqê li ser sûcên DAIŞê lêkolînan dike û li ser wan tawanan gelek belge dane hev.
UNITAD herwiha ji bo dîtina cihên gorên bikom ên ku DAIŞê kolane û parastina şahidan jî alîkariyê dide Îraqê.
UNITADê da zanîn ku wan belgeyên xwe bi berdewamî bi Îraqê re parve kirine û dema erkê wan xelas bû jî di hemû belgeyan bidin Hikûmeta Îraqê.
“68 gorên bikom hatine vedan”
UNITADê li ser xebatên xwe yên heta niha ev agahî dan:
“68 gorên bikom ên dema DAIŞê hatine vedan.
18 milyon belgeyên kaxezî yên li ser DAIŞê hatine dîjîtalkirin.
Herwiha gelek belge, wêne û dîmenên ku ketine destên hêzên Îraqê hatine arşîvkirin.”
“Me 40 terabayt belge dan hev”
UNITADê amaje pê kir ku wan karên serkeftî kirine û pê de çû:
“Me 40 terabayt belge dan hev. Ev jî nîşan dide ku em di wî erkî de serkeftî ne.
Helbet ev bi hevkariya berpirsên Îraqê hatiye kirin.”