BEXDA – Du parlamenterên PDK û yekî Goran hatin cezakirin

Hewlêr (Rûdaw) – Bi îmzeya Serokê Parlamentoya Iraqê Selîm Cibûrî, sê parlamenterên Kurd bi cemidandina endamtiya wan a parlamentoyê bo 15 rojan û birîna meaş hatin cezakirin.

Parlamenterê Fraksyona Tevgera Goran Mesûd Heyder, Parlamenterên Fraksyona Partiya Demokrat a Kurdistanê (PDK) Şaxewan Ebdulla û Sîrwan Ebdulla Sîrînî hatine cezakirin û nikarîn di rûniştina Dûşema borî ya parlamentoyê de gotarên xwe pêşkêş bikin.

Parlamenterê Fraksyona Tevgera Goran Mesûd Heyderî, biryara parlamentoyê ji Tora Medyayî ya Rûdawê re piştrast kir û got: “Em ê derbarê biryarê de rêyên yasayî bidin pêşiya xwe. Cezakirina me li ser berevanîkirina xelkê Kurdistanê ye û bo me şanazî ye.”

Li gor Mesûd Heyder, di biryarê de ji xeynî cemidandina endamdiya wan bo 15 rojan û birîna meaşê wan, hevdem gefa dûrxistina ji parlamentoyê jî lê hatiye kirin.

Di rûniştina roja Dûşema (05.02.2018) borî ya Parlamentoya Iraqê de li ser butceya 2018ê gotûbêj hatibû kirin û alozî derketibûn.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger