Li Pakistanê 16 leşker hatin kuştin

Hewlêr (Rûdaw) – Li bakurrojavayê Pakistanê li xaleke leşkerî ya li nêzîkî sînorê Efxanistanê 16 leşker hatin kuştin.

Yekîneya Têkiliyên Gel a Artêşa Pakistanê (ISPR) da zanîn ku êriş li li herêma Weziristana Başûr, li bajarê Makeenê pêk hatiye û got:

"Êriş hat têkbirin û 8 terorîst hatin kuştin lê 16 leşker jî mirin.”

Artêşa Pakistanê ragihandibû ku vê mehê di operasyonên leşkerî yên li ser bingeha îstixbaratê de li parêzgehên bakurrojava û başûrrojavayê welêt “herî kêm 43 terorîst” hatine kuştin.

Li Pakistanê êriş bi taybetî li parêzgehên Xeyber Pextunxwa û Belûçistanê çêdibin ku sînorê wan bi Efxanistanê re heye.

Şervanên ku dibêjin “Em mafên Peştû û Belûçiyan diparêzin” carinan êrişî hêzên ewlehiyê yên Pakistanê dikin.

Li gorî Pakistanê, Talîbana Efxanistanê xwe li Efxanistanê bi cih dike û çalakiyên xwe li wê derê organîze dike lê Efxanistan van îdiayan red dike.

Artêşa Rizgariya Belûçistanê (BLA) jî li Belûçistanê çalakiyên leşkerî li dar dixe û dixwaze ku Belûçistan ji Pakistanê veqete û gelê Belûç xwe îdare bike.