Hizbulahê êriş kir, 14 leşkerên Îsraîlê birîndar bûn
Hewlêr (Rûdaw) - Hizbulaha Libnanê diyar kir ku wan ji bo standina tola kuştina 3 leşkerên xwe êrişî Îsraîlê kir û di wê êrişê de 14 leşkerên Îsraîlê birîndar bûn.
Hizbulaha Libnanê ragihand ku wan bi dronên kamîkaze û mûşekan êrişî navendeke leşkerî ya Îsraîlê ya li gundê Ereb Eramşeyê kiriye.
Li gorî daxuyaniya Hizbulaha Libnanê, ji ber wê êrişê 14 leşkerên Îsraîlê birîndar bûne.
Herwiha rewşa 2 leşkerên birîndar jî giran e.
Gundê Ereb Eramşeyê li ser sînorê bakurê Îsraîlê û başûrê Libnanê ye.
Piraniya şêniyên gundên Ereb Eramşêyê Erebên bedewî ne.
Hizbulaha Libnanê amaje bi wê yekê jî kir ku di êrişa Îsraîlê ya gundên Eyin Bel û Şehabiyê de 3 leşkerên wê hatibûn kuştin û wan heyfa xwe hilandiye.
Îsraîlê roja sêşemê eşkere kiribû ku wan 3 endamên Hizbulaha Libnanê kuştine.
Li gorî zanyariyan, 2 kesên ku hatine kuştin fermandarê Hizbulaha Libnanê bûn.
Hizbulaha Libnanê ji destpêka şerê Îsraîl û Hemasê ve bi awayekî neyekser çepereke şer li hemberî Îsraîlê vekiriye.
Her du alî bi muşek û dronan êrişî hevdû dikin û di heyama 3 rojên dawî de Hizbulah bê navber êrişî Îsraîlê dike.
Ji 7ê Çiriya Pêşîn a 2023yan heta niha li Libnanê 368 kes hatine kuştin û 70 ji wan sivîl in.
Artêşa Îsraîlê jî ragihandiye ji ber êrişên Hizbulaha Libnanê heta niha 10 jê leşker 18 Îsraîlî hatine kuştin.