Îsraîlê êrişî xelkê li benda alîkariyê kir: Bi dehan kuştî û birîndar hene
Hewlêr (Rûdaw) – Hat ragihandin ku leşkerên Îsraîlê, li Xezeyê êrişî xelkê li benda alîkariyê kiriye.
Li gorî Wezareta Tenduristiyê ya li Xezeyê, di vê êrişê de 20 kes hatine kuştin û 155 kes birîndar bûne.
Li gorî daxuyaniyê, bûyerê li Xaçerêya Kuwêtê ya li Xezeyê rû daye û êrişî wan kesan hatiye kirin ku ji bo alîkariyên mirovî di dorê de bûn.
Amaje pê hat dayîn ku birînên hinek birîndaran xedar in û dibe ku hejmara miriyan zêde dibe.
Ajansa fermî ya nûçeyan a Filistînê WAFAyê jî da zanîn ku bi dehan kuştî û birîndar hene.
Li hêla din, gelek ajansên biyanî da zanîn ku herî kêm 29 kuştî hene.