Li gundekî Şirnexê merasîma Zêwê
Hewlêr (Rûdaw) - Gundê Banayê yê navçeya Basayê ya parêzgeha Şirnexê 4 kîlometreyan dûrî Çemê Dîcleyê ye û dikeve quntara Çiyayê Gabarê.
Xelkê gund amadekariya sazkirina merasîma Zêwê dike. Hinek nan li tenûrê didin, hinekan beroşên xwarinê danîne ser agir û hinek jî ji nav dehlan vedigerin daku bigihin Zêwê.
Bi hatina bayê nû ku hewa diguhere û hênik dibe, xelkê gund hemû, êvarekê bi hev re şîvê dixwin û ji vê şîvê re dibêjin Zêw.
“Ji dema dînê Zerdeştiyê heta niha heye”
Welatî Îbrahîm Ozkan anî ziman:
“Ji destpêka dîroka Kurdistanê heta niha Zêw heye.
Du Zêwên me hene. Li Kurdistanê ji dema dînê Zerdeştiyê bigire heta niha heye. ”
Dîrokeke gelekî kevn a Zêwê heye. Salê 2 caran tê saz kirin. Carekê dema ku bayê destpêka meha Îlonê tê kirin û carekê jî piştî birinc hat dirûn û hemû qutê zivistanê hat rakirin tê sazkirin.
Wek îbadetekê ye ji bo xwezayê û nîmeta ku xwezayê daye wan.
Êvara Zêwê her mal xwarina xwe dibe meydana gund û li wir xwarin tê rêzkirin û hemû xelkê gund bi hev re şîvê dixwin.
Berê li piraniya gundên vê navçeyê Zêw dihat kirin.
“Xelk bi hev re xwarinê dixwe”
Welatî Hediya Çetînê got:
“Dema dibe bayê nû, êvara înê mele bang dide, dibêje Zêwa bayê nû ye, ya Şêxê Gêlkî ye.
Her kes pezê xwe digorîne, goşt û girara xwe çê dikin. Siniyên xwe tijî xwarin dikin û li meydanê datînin.
Xelk bi hev re xwarinê dixwe û Fatiheyê dixwîne û diçe malê.”
Gundê Banayê yê ku 20 kîlometreyan dûrî Cizîra Botanê ye wek piraniya gundên çiyayî yên parêzgeha Şirnexê sala 1993yan hatibû şewitandin.
Xelkê gundê xwe bi cih hiştibû û çûbûn bajarên Tirkiyeyê lê sala 2008an xelk vegeriya gundê xwe û gund ji nû ve ava kir.
Piştî vegerê wan dîsa cejn û nerîtên xwe yên kevn zindî kir ku Zêw jî yek ji wan e.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse