Tirkmen dixwazin parêzgariya Kerkûkê di destê wan de be: ‘Me jî biceribînin’
Hewlêr (Rûdaw) - Piştî 18 salan, hilbijartinên encûmena parêzgeha Kerkûkê hat kirin.
Kurd, Tirkmen û Ereb ji bo postên îdareya parêzgehê dest bi gotûbêj û danûstandinan dikin.
Tirkmen li ser postê parêzgariya Kerkûkê ji bo rêkeftina bi Kurd û Ereban re û pêkanîna hikûmeta xwecihî, bi eşkere merc û daxwazên xwe tînin ziman.
Tirkmen hevdem red dikin ku wan bi Ereben re li hev kiribe.
“Ti hevpeymanî û rêkeftineke me bi ti aliyekî re nebûye”
Berpirsê Rêxistinên Siyasî yên Bereya Tirkmenî ya Îraqê Mardîn Gokkaya got:
“Her aliyê ku niyeta rêvebirina parêzgeha Kerkûkê û xizmetkirina Kerkûkiyan hebe em jî bi wan re ne. Berî hilbijartinan û piştî hilbijartinan ti hevpeymanî û rêkeftineke me ya fermî û nihênî bi ti aliyekî re nebûye.
Em bi eşkere dibêjin li Bereya Tirkmenî bi wê mercê ku niyeteke paqij hebe ji bo pêkanîna hikûmeta xwecihî ku hemû pirsgirêk û krîzan çareser bike û take armanc xizmetkirina bajêr û xelkê be deriyê me ji hemû aliyên serkeftî yên Kerkûkê re vekiriye.”
Yekitiya Niştîmanî ya Kurdistanê (YNK) 5 kursiyên Encûmena Parêzgeha Kerkûkê bi dest xistine.
Li ser postên parêzgeha Kerkûkê amadebûna xwe ji bo danûstandinên ligel hemû aliyên Kurdistanî û neteweyên din ragihandiye.
Partiya Demokrat a Kurdistanê (PDK) jî tevî ku têbîniyên wê li ser encamên hilbijartinên encûmena parêzgeha Kerkûkê hene di daxuyaniyekê de got:
“Em li ser bingehê hevbeşî û cîbîcîkirina rêkeftinnameyên siyasî, asayîkirina rewşa wan navçeyên ku berê rêkeftin derbarê wan de hatiye kirin û dabînkirina ewlehî û xizmetguzariyê ji bo pêkanîna hikûmetên xwecihî yên parêzgehan ji bo diyalog û pevguherîna nerînan amade ne.”
Bereya Tirkmenî ku xwediya 2 kursiyan e daxwaza postê parêzgariyê dike û dibêje, “Bila me jî biceribînin.”
Komîsyona Bilind a Serbixwe ya Hilbijartinên Îraqê encamên dawî yên hilbijartinên encûmena parêzgehên Îraqê ragihandin.
Li gorî encaman ti aliyekî nikariye 50 kom yekê (50+1) dengan bi dest bixe, ji ber wê jî postê parêzgarê Kerkûkê pêwîstî bi rêkeftinê ye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse