Kurdistan
Nerazîbûna parlamenter û alîgirên DEM Partiyê li pêş avahiya şaredariyê \ Wêne: Medyaya Civakî
Hewlêr (Rûdaw) – Parlamenterê DEM Partiyê yê Wanê Sînan Çîftyurek bangî hikûmetê kir ku êdî ji wan re bi eşkereyî bibêjin ku hilbijartin û sindoq nînin.
Şeva borî bi biryara Wezareta Karên Navxwe ya Tirkiyeyê qeyûm tayînî şaredariya navçeya Miksê ya Wanê hat tayînkirin.
Piştî biryarê avahiya şaredariyê ji aliyê polîsan ve hat dorpêçkirin.
Berpirsên DEM Partiyê û hejmareke zêde ya xelkê navçeyê çûn pêşiya şaredariyê û nerazîbûna xwe nîşan dan.
Li pêşiya avahiya şaredariyê di navbera xelkê û polîsan de alozî derketin.
“Bibêjin sindoq û hilbijartin nînin”
Sînan Çîftyûrek bi tundî bertek nîşanî tayînkirina qeyûm kir û got:
“Gotin em aştiya xwe ya navxwe û yekîtiya xwe pêk bînin, siyaseta xwe nerm bikin.
Birêz Serokkomar got, ‘em diyalogê bikin’ ma diyalog ev e?
Ma bêyî li benda pêvajoya hiquqî bimînin, bi dûrxistina wan hevserokên şaredariyan ku li gor yasayên Desteya Bilind a Hilbijartinan hatine hilbijartin dê li Tirkiyeyê aştiya navxweyî pêk were?
Ma biratiya Kurd û Tirkan dê wiha çêbibe?Ma ew tişta ku hûn dibêjin biratiya Kurd û Tirkan a hezar salî dê wiha pêk bê?
Kurdan îradeya xwe nîşan dan. Di çarçoveya yasayên we de ev yek kirin lê hûn wê îradeyê nas nakin.
Wê demê bibêjin, ‘sindoq û hilbijartin nîn in û li karê xwe binêrin’ bibejin,’hûn sax û em jî silamet’”
Roja pênceşemê dadgehê bi hinceta “pêkanîna tawan li ser navê rêxistina PKKyê” 3 sal û 11 meh cezayê girtîgehê dabû Hevserokê Şaredariya Miksê Ayvaz Hazir.
Wezareta Karên navxwe ew ceza û dozeke ku ji ber propgandeya rêxistinê berdewam dike di biryara xwe de wekî hincet nîşan da û Ayvaz Hazir ji kar dûrxist.
Qeymeqamê Miksê Ayvaz Hazir jî wek qeyûm li şûna wî danî.
“Miks a me ye”
Ayvaz Hazir li ber avahiya şaredariyê axivî û wiha got:
“Bila baş bizanibin ku gelê Miksê em in. Em ligel gelê Miksê li ser piyan in. Miksa me ne tenê avahiyeke şaredariyê ye.
Çawa ku me 31ê Adarê bi gelê xwe re qezenc kiribû em dê careke din hemû xebatên xwe bi gelê xwe re bimeşînin.”
DEM Partiyê li ser hesabê xwe yê medyaya civakî bang li dengder û alîgirên xwe kir ku dijî biryara qeyûm mafê xwe yê protestoya demokratîk bikarbînin.
Li aliyê din parêzgariya Wanê di daxuyaniyekê de ragihand ku hemû cure çalakî 10 rojan li seranserê parêzgehê hatine qedexekirin.
Piştî hilbijartinên 31ê Adarê û heta niha tevî Miksê bi giştî qeyûm li ser 7 şaredariyên Bakurê Kurdistanê hatine danîn ku 6 ji wan ên DEM Partiyê ne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse