Hewlêr (Rûdaw) - DAIŞê êrîşî xaleke pişkinînê ya Artêşa Iraqê û Heşda Şeibî li Xaneqîn kir, di encama wê êrîşê de serbazek hatiye kuştin û 4 serbazên din birîndar bûne.
Nûçegihanê Rûdawê li Xaneqînê ragihand, “şeva bihorî derange şevê çend çekdarên DAIŞê li nêzîkî gundê Şêrk êrîşî baregeha Fewca 2 ya Artêşa Iraqê kirine, şer çêbûye û di encama şer de serbazek bi navê Heyder Tahir Hesnawî hatiye kuştin û 4 serbazên din birîndar bûne.”
Alîkarê Rêveberê Asayişa Kokisê, Şemal Ebdulrehman ji Rûdawê re ragihand, “dema ku hêzeke din a Artêşa Iraqê bo alîkariyê diçû cihê cihê êrîşê, bombek bi hamereke hêzên Iraqê de teqiyaye û ew wesiyata serbazî hatiye têşikandin.”
Gundê Şêrk ser bi qezaya Xaneqînê ve ye û dikeve sêguşeya navbera Xaneqîn-Kokis-Gulaleyê.
Ew demeke dirêj e ku DAIŞê êrîşên xwe bo ser hêzên ewlehiyê yên Iraqê, bi taybet li navçeyên Kerkûk, Selahedîn, Diyale, Enbar û derdora Bexdayê zêde kiriye û di wan êrîşan de hejmarek berpisên pilebilind ên serbazî yên Iraqê hatine kuştin.
Fermandariya Operasyonên Hevbeş ên Iraqê ragihandiye, şeva Sêşemê Emîd Rukin Ehmed Ebdulwehab Lamî, Fermandarê Lîwaya 29 a Firqeya 7 a Artêşa Iraqê di dema operasyoneke li dijî grûpeke terorîstî li qezaya Hît hatiye kuştin.
Wezareta Berevaniya Iraqê jî roja 17ê vê mehê ragihandibû, Fermandarê Lîwaya 59 a Bejayî, Emîd Rukin Elî Hemîd ji aliyê çekdarên terorîst ve li navçeya Bin Sînay a ser bi bajarokê Tarimiye ya Bexdayê hat kuştin.
Ji ber zêdebûna liv û tevgerên DAIŞê li sînorê çend parêzgehên Iraqê û navçeyên Kurdistanî yên li derveyî îdareya herêma Kurdistanê, hêzên Iraqê meha bihorî operasyonek di çar qonaxan de li dijî wê rêxistinê pêk anî.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse