Tirkiyê devera Şêladizê bombebaran kir
Hewlêr (Rûdaw) - Bombebaran û topbaranên Tirkiyê li ser herêmên sînorî yên Başûrê Kurdistanê berdewam in û firokeyên Tirkiyê îro jî Çiyayê Kure Jar li hindavê Dêrelûk û Şêladizê bombebaran kir.
Peyamnêrê Rûdawê da xuyakirin ku balafirên Tirkiyê Çiyayê Kure Jar bordûman kirine ku 1.5-2 km dûrî navçeyên nîştecêbûnê ye.
Herweha sibeha îro saet 04.00 sibehê topek ber gundê hirûrê ketiye.
Dema 3 rojane ji ber bordûmanan agir ber aqarê gundên birîfka, Hirûrê ketiye û ber bi gundê Qumriyê diçe û ziyaneke zaf gihandiye wan navçeyan.
Ev di demekê de ye ku duh şer bi tundî berdewam bû û 2 caran tuneleke gerîalyên PKK hat bombebarankirin û tirseke mezin di nav welatiyan de belav bû.
Heta niha 5 gund hatine valakirin ku ew jî Kêste, Çelka Krîstiyanan, Edinê , Dêşîş û Serero ne û herwiha metirsî li ser gundê Ure jî heye û 6 malên ku di gund de asê mabûn rizgar bûne.
Artêşa Tirkiyê roja 23ê Nîsana borî bi hinceta hebûna gerîlayên PKKê operasyoneke berfireh li nav sînorên Başûrê Kurdistanê daye destpêkirin û bi tundî herêmên sînorî bombebaran û topbaran dike û hejmara xalên xwe yên serbazî zêde dike.
Herwiha jibilî şewata li daristanên Başûrê Kurdistanê ji ber topbaran û bombebaranan, Serokê Encûmena Parêzgeha Duhokê ji Rûdawê re ragihandibû ku Tirkiye çend sal in li gel hinek kompanyayan rêkeftiye ji bo daristanên navçeyên şer bibirin bi hinceta ku “bûne stargehên gerîlayên PKKê.”
Berdevkê Desteya Jîngehê ya Herêma Kurdistanê jî ji Rûdawê re radigihdibû ku di heyama 10 salan de zêdetir ji milyonek donim erdê Başûrê Kurdistanê hatiye şewitandin û amaje bi wê jî kir, tenê sala 2020, ji %35ê bûyerên şewatê ji ber bombebarankirina navçeyên sînorî bû ji aliyê welatên cîran ve.