Zîpikê îro Amed spî kir

Hewlêr (Rûdaw) - Li Amedê barana zêde û teyrokê bandorek neyînî li jiyanê kir.

Piştî barana ku ji nişka ve li bajêr bariya, av li ser rê û kolanan kom bû. Piştî demekê ji barîna baranê, li bajêr zîpik (teyrok) jî barî.

Ji ber barîna zîpikê erd spî bû, peya û ajokar jî zehmetî kişandin.

Li bajêr hinek ji şofêran bi ketina nav benzînxaneyan hewl dan wesayîtên xwe biparêzin, hin şofêran jî wesayîtên xwe li otoparkên sergirtî park kirin û li benda sekinîna zîpikê man.

Ji aliyê din ve Rêveberiya Herêma 15emîn a Meteorolojiyê di daxuyaniyekê de ji bo seranserê parêzgeha Amedê hişyariya barîna baranê da.

Di daxuyaniyê de herwiha hatiye pêşbînîkirin ku li deverên bilind şilope û berf bibare, herwiha derbarê lehiyê de hişyarî hatiye dan.