SIWÊREG – Ji bo parêzgehbûnê 100 hezar îmze
Hewlêr (Rûdaw) - Kampanya komkirina 100 hezar îmzeyan ji bo parêzgehbûna navçeya Siwêregê ya ser bi parêzgeha Rihayê ya Bakurê Kurdistanê birêve diçe.
Xelkê navçeya Siwêregê daxwaza mafê parêzgehbûnê dikin ku sala 1926an ji wan hatibû wergirtin. Ji bo vê armancê sala 1990î Komeleya Parêzgehkirin û Pêşxistina Siwêregê ava kirin û bênavber xebatên parêzgehbûnê dimeşînin.
Alîkarê Serokê Komeleya Parêzgehkirin û Pêşxistina Siwêregê Ferit Akçali anî ziman, “Armanc û xebata me ji bo parêzgebûna Siwêregê ye, di sala 1923an de Siwêreg parêzgeh bû û 3 navçeyên wê hebûn ku Çermûk, Hilwan û Wêranşar bûn, heta 1926an parêzgeh bû paşê kirine navçe.”
Armanca Komeleya Parêzgehkirin û Pêşxistina Siwêregê, sed hezar îmze ye. Piştî komkirina sed hezar îmzeyî, dê berpirsên komeleyê îmzeyan li Enqerê pêşkêşî aliyên siyasî û Parlamentoya Tirkiyê bikin.
Welatî Ramazan Ogretmiş got, “Hefteyek e ji bo em 100 hezar îmzeyan berhev bikin di nava Siwêregê de digerin. Me heta niha 81 hezar îmze berhev kirine û em li parêzgehên din jî ji bo berhevkirina îmzeyan digerin.”
Siwêreg sala 1867an wek qezayeke eyaleta Kurdistanê hat qebûlkirin. Di navbera salên 1908 û 1923an wek parêzgeheke serbixwe ser bi eyaleta Diyarbekirê ve bû. Sala 1923an bi avakirina Komara Tirkiyê re bû parêzgeheke serbixwe û sala 1926an statuya wê ya parêzgehbûnê hat betalkirin û wek navçeyeke Rihayê hat diyarkirin. Navçeya Siwêregê niha bi 270 hezar niştecihên xwe li ser asta Bakurê Kurdistanê û Tirkiyê ji 35 parêzgehan mezintir e.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse