Hewlêr (Rûdaw) - Hevserokê Konseya Rêveber a KCKê Cemîl Bayik ragihand, “yên li dijî perçebûna Tirkiyê disekinin, Apo û PKK ne. Ji bo vê berdelên mezin didin.”
Hevserokê Konseya Rêveber a KCKê Cemîl Bayik, beşdarî bernameyeke taybet a kanaleke nêzikî PKKê bû û rewşa herî dawî ya li Kurdistanê û navçeyê nirxand.
Cemîl Bayik derbarê rewşa Rojavayê Kurdistanê û Sûriyê de got, “eger Kurd bibin xwedî statuyekê, li Sûriyê rewşeke demokratîk dê derkeve holê. Ev yek jî dê bandoreke mezin li ser Tirkiyê bike û AKP û MHP jî wê demê nikarin bibin desthilat. Ji bo ku Osmaniya nû ava bikin, rê li ber statuyeke Kurdan li Sûriyê digirin. Li dijî gelan û Kurdan dijminatiyê dikin.”
Cemîl Bayik pevçûn, rûdan û pêşhatên li Rojhilata Navîn weke ‘şerê cîhanê yê sêyem’ bi nav kir û got ku ew şer dê kurtir bibe û diyar kir, “Dewletan berî niha bi rêya hêzên din ev şer dimeşandin, alîkariya grûpên girêdayî xwe dikirin. Lê niha ew dewlet daketine qadê û ketine nav şer. Niha dewlet wî şerê birêve dibin.”
Bayik herwiha got ku gefa DAIŞê bi dawî nehatiye û di warên serbazî, siyasî û civakî de berdewam dike û ragihand, “modernîteya kapîtalîst DAIŞ damezrand û heta ku dewletên li Rojhilata Navîn ji nav neçin, ev rêxistin dê her tim hebin.”
Wî berpirsê PKKê diyar kir ku ew piştevaniya danûstandinên di navbera Rêveberiya Xweser û rejîma Sûriyê dikin û got ku Rêveberiya Xweser ti caran behsa avakirina dewleteke cuda nekiriye û gotiye ku ew beşek ji Sûriyê ne.
Di berdewamiya gotinên xwe de Cemîl Bayik got, ku Rêberê PKKê Abdullah Ocalan “her tim li hemberî gelan û Tirkiyê bi awayekî berpirsyar tevgeriyaye û ji bo pirsgirêkên Tirkiyê bernameya demokrasî û çareseriyê pêş xistiye, ne tenê ji bo gelê Kurd, ji bo gelên Tirkiyê difikire.”
Bayik got ku Abdullah Ocal dixwaze Tirkiyê demokratîk bike û ragihand, “Ji bo vê jî divê gelê Tirkiyê yên ku hîn jî alîkariya AKP-MHPê dikin, bizanin ku ew dijminên wan ên mezin in. Ew dijminahiyeke mezin ji bo Tirkiyeyê dikin. Ew ji bo gel bixapînin dibêjin; ‘Apo, PKK û gelê Kurd Tirkiyê perçe dikin. Halbûkî yên Tirkiyê perçe dikin ew bi xwe ne. Yên ku li dijî wê disekinin û berjewendiyên gelê Tirkiyê diparêzin Apo, PKK û gelê Kurd e ku têkoşîna wê dike. Ji bo wê berdêlên mezin dide, divê ev yek baş bê famkirin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse