Hewlêr (Rûdaw) – Tê payîn sibe, 30-07-2017 Civata Bilind a Referandûmê ya Başûrê Kurdistanê bicive. Endamekî civatê dibêje, dê nexşerêya paşerojê were diyarkirin.
Endamê Civata Bilind a Referandûmê Ebdullah Wertê ji Rûdawê re ragihand: “Roja Yekşemê 30-07-2017, Civata Bilind a Referandûmê dê li Selahadîn bicive. Di civînê de dê nexşerêya paşerojê ya civatê were diyar kirin.”
Wertê da zanîn, ku biryare di civînê de komîsyonên siyasî û dîplomasî ya ji bo serdana welatan were pêkanîn.
Ebdullah Wertê got: “Dibe ji bo dîplomasiyê 2 komîsyon werin avakirin. Yek ji wan ji bo serdana welatan û ya din jî ji bo serdana Bexdayê.”
Roja 7ê Hezîrana 2017ê, Serokê Herêma Kurdistanê Mesûd Barzanî ligel piraniya partî û aliyên siyasî yên Herêma Kurdistanê civiya û di civînê de biryar hate wergirtin, ku roja 25ê Îlona 2017ê, ji bo serxwebûna Başûrê Kurdistanê referandûm were kirin. Herwiha biryar hate dayîn Civata Bilind a Referandûmê were avakirin.
Civata Bilind a Referandûmê roja 8ê Tîrmehê yekemîn civîna xwe bi serokatiya Serokê Herêma Kurdistanê Mesûd Barzanî, saz kir.
Piştî vê şandekî Kurdistanê serdana Belçîkayê kir û li gel berpirsên vî welatî û herwiha yê Yekîtiya Ewropayê hevdîtin pêk anî.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse