Firokeyên hevpeymaniyê pêgehên DAIŞê li Hemrîn bombebaran kirin

RÛDAW

Hewlêr (Rûdaw) - Balafirên Hevpeymaniya Navdewletî çend xalên DAIŞê li çiyayê Hemrînê bombebaran kirin, û

 

Wezareta Berevaniya Iraqê dibêje, ku di wê êrîşê de hejmarek ji berpirsên DAIŞê hatine kuştin.

 

Di daxuyanieyke nivîskî de ku ji aliyê navenda ragihandina ewlehiyê ya girêdayî Wezareta Berevaniya Iraqê ve hatiye belavkirin, hatiye ragihandin ku roja Pêncşemiyê, balafirên şer ên Hevpeymaniya Navdewletî, êrîşî ser çend pêgeh û xalên DAIŞê li çiyayê Hemrînê kirine.

 

Li gorî wê daxuyaniyê, di encama bombebarana balafirên Hevpeymaniya Navdewletî de, serbazgehek û 3 tonêlên DAIŞê hatin jinavbirin.

 

Herwiha di daxuyaniyê de hatiye gotin, ku hejmarek ji berpirsên DAIŞê di wê êrîşê de hatine kuştin, lê belê amaje bi hejmar û nasnameya wan berpirsên DAIŞê nehatiye kirin.


Di wan demên dawiyê de, liv û tevgerên çekdarên DAIŞê li sînorê parêzgehên Diyale, Selahedîn û Kerkûkê û herwiha zincîre çiyayên Hemrînê ku dikeve navbera wan her sê parêzgehan, zêde bûne.