Hewlêr (Rûdaw) Çekdarên grûpa Feleq el-Şam a girêdayî Tirkiyê 2 welatiyên Kurd ji gundê Neydan Ekbesê li herêma Efrînê revandin.
Rêxistina Mafên Mirov li Efrînê ragihand ku çekdarên Feyleq el-Şam avêtine ser malên welatiyên Kurd li gundê Meydan Ekbesê.
Çekdarên grûpa ku baskê leşkerî yê Ixwan Mislimîn e, bi fermandariya Selîl El-Xaldî û Raid Hîşam, herdu welatiyên bi navê Şewqî Mistefa, 65 salî, û Horo Ehmed, 37 salî, revandine.
Çekdarên heman grûpê avêtine ser çend malên din jî û telefonên destî yên 3 welatiyan desteser kirine.
Bi sed hezaran Kurd ji Efrînê koçber bûne
Artêşa Tirkiyê û grûpên çekdarên ên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.
Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.
Di encama êrişên giran û ketina bajêr bo destê çekdaran de, bi sed hezaran xelkê Kurdan mal û warên bicî hiştin û ketin ser rêyên koçberiyê.
Herwiha ji wê roja ku Efrîn ket bin kontrola artêşa Tirkiyê û komên çekdar ên opozisyona Sûriyê, binpêkariyên li hember welatiyên Kurd li wê herêmê berdewam in.
Heta niha ji aliyê rêxistinên xwecihî û navdewletî ve bi dehan binpêkariyên li dijî xelkê sivîl hatine tomarkirin ku ji aliyê çekdarên girêdayî Tirkiyê ve hatine encamdan.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse