Hewlêr (Rûdaw) – Şaredarê navçeya Xelfetî ya Rihayê li bakûrê Kurdistanê Mehmûd Ozdemîr ku endamê partiya komarî ya gel a Tirkiyê (CHP) ye diyar kir, dê ji CHPê veqete û tevlî BDPê bibe.
Li gorî nûçeya DÎHAyê, şaredarê Xeleftiyê Mehmûd Ozdemîr ragihand, ji ber ku CHPê xwe tevlî pêvajoya çareserî û aştiyê ya li Tirkiyê nekiriye û guh nedaye dengên kurdan dê ji wê partiyê veqete.
Ozdemîr diyar kir ku gelek caran ji rayedarên CHPê re rapor nivîsandiye û ji wan xwestiye ku xwe telvî pêvajoya çareseriyê bikin û ji AKP û BDPê re bibin alîkar lê qet bersiva wî nedane û guhê xwe ji dengên xelkê deverê re girtine.
Şaredarê Xelfetiyê wiha axivî: “Ev devera ku ez şaredariya wê dikim zêda Abdullah Ocalan e, li vir him tirk heye him jî kurd û hemû jî bi awayekî aştiyane bi hev re dijîn. CHP di vê pêvajoyê de xwe ji vê deverê dûr girt ji ber ku ditirse dengan wenda bike û guhê xwe nade xelkê vir. Ji ber wê jî ez ji partiya xwe vediqetim.”
Mehmûd Ozdemîr destnîşan kir ku dê tevlî partiya aştî û demokrasiyê (BDP) bibe û li nav wê partiyê de xebata xwe ya siyasî bidomîne.
Tê zanîn rêberê PKKê Abdullah Ocalan li gundê Omera li devera Xelfetî ya Rihayê ji dayik bûye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse