Hewlêr (Rûdaw) - Konsulxaneya Amerîkayê ya li Hewlêrê, êrişa DAIŞê ya li ser Pêşmerge şermezar kir û tekez kir ku Amerîka dê berdewam be li ser piştevaniya Hêzên Pêşmerge ji bo “piştrastbûna ji berdewamiya têkçûna DAIŞê.”
Çekdarên DAIŞê şeva derbasbûyî li devera Tepî Telan a ser bi bajarokê Kuleco yê Silêmaniyê ve, ji du aliyan êrişî Hêzên Pêşmerge kir û di encamê de 5 Pêşmerge şehîd bûn û 4 Pêşmerge jî birîndar bûn.
Konsulxaneya Amerîkayê ya li Hewlêrê derbarê êrişa DAIŞê ya li ser Pêşmerge de daxuyaniyek belav kir û ragihand, “Em bi tundî êrişa terorîstên tirsonek ên DAIŞê ya li ser Hêzên Pêşmerge şermezar dikin.”
Konsulxaneya Amerîkayê di peyama xwe de ku li ser torên civakî belav kiriye, dûpat dike, “Amerîka pêdagir e li ser piştevaniya bo Hêzên Pêşmerge û hêzên emnî yên Iraqê û piştevaniya li hewlên wan ji bo piştrastbûna ji berdewamiya têkçûna DAIŞê.”
Herwiha Konsulxaneya Amerîkayê di daxuyaniya xwe de serxweşiyê ji malbatên pêşmergeyên ku di êrişa DAIŞê de şehîd bûne dixwaze û dibêje, “Em hevsoziya xwe arasteyî wan pêşmergeyên qehreman dikin ku di wê êrişê de giyana xwe spartin û birîndar bûn.”
Çekdarên DAIŞê şeva derbasbûyî saet 22.45 li devera Tepî Telan ê ser bi bajarokê Kuleco yê Silêmaniyê ve ji du aliyan ve êrîşî sengerên Hêzên Pêşemerge kir û di encamê de 5 Pêşmerge şehîd bûn û 4 Pêşmerge jî birîndar bûn.
Serokê Herêma Kurdistanê Nêçîrvan Barzanî di peyamekê de sersaxî ji malbatên pêşmergeyên ku di êrişa şeva derbasbûyî ya DAIŞê de şehîd bûn re xwest û got, “Zêdebûn û berfirehbûna êrişên DAIŞê, peyamek ciddî ya tirsnak e û gefên rasteqîn li herêmê çêdike.”
Serokwezîrê Herêma Kurdistanê Mesrûr Barzanî derbarê êrişa DAIŞê ya şeva derbasbûyî de ku bû sedema şehîdbûna 5 Pêşmerge, peyamek belav kir û Wezareta Pêşmerge raspard ku ji bo rêgirtina li êrişên DAIŞê amadekariyên zêdetir bike.
Fermandarê Mîhwera Germesêr a Hêzên Pêşmerge jî li ser êrişa DAIŞê ji Rûdawê re ragihand, “Me berî niha hişyarî dabû ku DAIŞ dê êriş bike” û got jî, “DAIŞ ji herêmên ji hêzên Iraqî êrişî Pêşmerge dike” û tekez dike, “Artêşa Iraqê ti hevahengiyek li gel me nîne. DAIŞ ji herêmên wan êrişî Pêşmerge dike.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse