Hewlêr (Rûdaw) - Din bin projeya projeya ku Yekîtiya Ewropayê (YE) û Bernameya Pêşketinê ya Neteweyên Yekbûyî (UNDP) amade kirine, dê 80 hezar mînên li ser sînorê Bakurê Kurdistanê û Rojhilatê Kurdistanê bêne paqijkirin.
Qonaxa duyemîn a projeya ku Yekîtiya Ewropayê fînanse dike, ji aliyê UNDP û Navenda Karûbarê Mînan a Neteweyî (MAFAM) ya Tirkiyê ve bi mebesta paqijkirina mînên dij-mirov li qadeke bi qasî 4.2 milyon metre çargoşe li ser sînorê Tirkiyê û Îranê ya di navbera Bakurê Kurdistanê û Rojhilatê Kurdistanê de dê îro bi bernameya vekirinê dest pê bike.
Serokê Delegasyona Yekîtiya Ewropayê Balyoz Nikolaus Meyer-Landrut û şanda li gel ku di çarçoveya projeya paqijkirina mînan de çûn Îdirê ya Bakurê Kurdistanê, serdana parêzgarê Îdirê Huseyîn Engîn Sariîbrahî kirin.
Meyer-Landrut di daxuyaniya piştî hevdîtinê de ragihand ku ew di çarçoveya projeya paqijkirina mînan de hatine Îdirê.
Meyer-Landrut diyar kir ku proje ji aliyê Yekîtiya Ewropayê ve tê fînansekirin û got “Em ê beşdarî çalakiya projeya paqijkirina mînan a ku ji aliyê me ve li Îdirê tê fînansekirin bibin. Proje ji aliyê Bernameya Pêşveçûnê ya Neteweyên Yekbûyî (UNDP) ve tê cîbicîkirin.”
Di çarçoveya projeyê de, mînên bejayî yên dij-mirov ên pir xeternak û qedexe, ku li gorî Peymana Ottawa ya ku di 2004an de ji aliyê Tirkiyê ve jî hatiye imzekirin têne paqij kirin.
Meyer-Landrut destnîşan kir ku di qonaxa yekem a projeyê de encamek serketî hatiye bidestxistin û dibêje “Ev qonaxa duyem a projeyê ye, di qonaxa yekem de me 18 milyon Euro xerc kir. Bi alikariya UNDP nêzîki 46 hezar mînên bejayî yên dij-mirov hatin paqijkirin. Niha jî em dest bi qonaxa duyem a projeyê dikin. Ew jî bi qasî 18 milyon Euro ye. Di qonaxa duyemîn de, tê hedefkirin ku 80 hezar mîn bên paqijkirin.”
Herwiha Meyer-Landrut diyar kir ku tevahiya projeyê bi 36 milyon Euro ye û wiha domand “Em armanc dikin ku di paqijkirina mînên dij-mirov de encamek baş bi dest bixin. Ev mîn pir xeternak in. Di heman demê de, di warên parastina sînor, kontrol û birêvebirina sînor de, ku em bi Tirkiyê re hevkariyê dikin, ji xwe ne li gorî standardan in.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse