Hewlêr (Rûdaw) - Odeya Bijîşkan a Amedê bi daxuyaniyekê ji Wezîrê Tenduristiyê ya Tirkiyeyê xwest ku Kurdî jî li ser sîstema e-Reçetemê (reçeteya elektronîk) zêde bike.
Wezareta Tenduristiyê ya Tirkiyeyê, hefteya borî 5 zimanên cuda li sîstema “e-Reçetem”ê zêde kirin lê cih neda Kurdî.
Wezîrê Tenduristiyê yê Tirkiyeyê Fahrettîn Koca ku bi xwe jî Kurd e ragihand, li sîstema e-Reçetemê 5 ziman hatine zêdekirin û got:
“Zimanên Îngilîzî, Almanî, Erebî, Fransî û Rûsî li sîstema e-Reçetemê hatine zêdekirin.
Zimanên ku pêvajoya ceribandina wan di sîstema e-Reçetemê de bi dawî bûne, dest bi xizmetê kir.”
Nebûna Kurdî ya di sîstema e-Reçetemê de bû sedema nerazîbûnan
Odeya Bijîşkan a Amedê li ser mijarê got:
“Herçiqasî amarên zelal nebin jî, li herêma me ji her 4 kesan 1 (piranî jin) ji bilî Kurdî zimanekî din nizanin (nêzîkî 4 milyon welatî).
Bi salan e di wergirtina xizmetên hikûmî de mafê bikaranîna zimanê dayikê yê welatiyan hatiye piştguhkirin.”
Odeya Bijîşkan a Amedê destnîşan kir ku eger bijîşk û nexweş ji hev fem nekin zanyariyên nexweşiyê jî bi başî nayên wergirtin û dermankirina nexweşan zehmet dibe.
Odeya Bijîşkan a Amedê herwiha got:
“Wergirtina xizmeta tenduristiya hikûmî bi zimanê dayikê mafê mirovan ê gerdûnî ye.
Ev ne rewşeke bijardeyî ye, neçarî ye. Ji ber ku dema mirov ziman nizanibe, nikare derdê xwe bîne zanîn.”
Odeya Bijîşkan a Amedê bangî Fahrettîn Koca kir û got:
“Ne bi helwestên siyasî, li gor nasnameya bijîşkî û nirxên hiqûqa gerdûnî tev bigere.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse