Hewlêr (Rûdaw) – Bafil Celal Talebanî careke din wek Serokê Yekîtiya Niştimaniya Kurdistanê (YNK) hat hilbijartin.
Îro berî demjimêr 11:00an 5emîn kongreya YNKyê bi beşdariya hejmarek mêvanên navxwe û Îraqî dest pê kir û mêvanan gotarên xwe pêşkêş kirin.
Piştî navberekê kongreyê dest pê kir û Bafil Celal Talebanî bi piraniya dengên endamên kongreyê wek Serokê Yekîtiya Niştimaniya Kurdistanê (YNK) hat hilbijartin.
Endamên kongreya pêncem a Yekîtiya Niştimaniya Kurdistanê (YNK) herwiha bi yekdengî Kosret Resûl Elî û Hêro Îbrahîm Ehmed ji ber rol û hewlên wan ên di dîroka YNKyê de, wek “Sembolên Bilind ên YNKyê” destnîşan kirin.
5emîn kongreya YNKyê bi beşdariya 600 endaman li Hola Hunerê ya Silêmaniyê tê lidarxistin û dê 3 rojan bidome.
Hejmara endamên serkirdayetiya partiyê dê were kêmkirin
Biryar e rêziknameya navxwe ya partiyê were guhertin û hejmara endamên serkirdayetiya partiyê ji 121an ji bo 51ê were kêmkirin.
Herwiha dê Endamên Encûmena Bilind a Siyasî û Berjewendiyên YNKyê jî dê bên destnîşankirin.
Tê çaverêkirin ku encûmeneke nû ya bi navê Encûmena Piştgiriyê bê avakirin û hejmara ofîsên YNKyê jî bên kêmkirin.
🔴 #BILEZ
— RudawKurdi (@RudawKurdi) September 27, 2023
Bafil Talebanî di kongreya 5emîn de careke din wek Serokê Yekîtiya Niştimaniya Kurdistanê (#YNK) hat hilbijartin. pic.twitter.com/oD7zXfGmU4
Bafil Talebanî kî ye?
- Bafil Celal Hîsamedîn Talebanî kurê mezin ê Mam Celal e
- Ew sala 1973yan ji dayik bû
- Berpirsê Ofîsa Sekreteriya Mam Celal bû
- Berpirsê Dijî Terorê yê Silêmaniyê bû
- Sala 1996an beşdarî perwerdeya hêzên biyanî yên Fransayê bû
- Sala 1998an beşdarî perwerdeya leşkerî ya Brîtanyayê bû
- Stratejiya siyasî li Amerîka û Brîtanyayê xwend
- Di kongreya çarem de bû endamê Encûmena Serkirdatiya YNKyê
- Di kongreya çarem de wek hevserok hat hilbijartin
- Zewicî ye û 3 zarokên wî hene
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse