Li Silêmaniyê kargeheke hesin teqiya

Silêmanî (Rûdaw) – Kargeheke helandina hesinan li bajarokê Bazyan teqiya. Ji ber teqînê karkerekî ji Nepalê jiyana xwe ji dest da û 3 kes jî birîndar bûn.

Teqîn vê êvarê roja çarşemê 27ê Îlona 2017an di saet 18:15an de li kargeha hesinî ya Sulaimani Steel li nahiyeya Bazyan a ser bi parêzgeha Silêmaniyê rûda.

Berdevkê polîsê navçe û nahiyeyên Silêmaniyê Mafperwer Îqbal Mihemed ji Rûdawê re ragihand, ku sedema teqînê kureya helandina hesinî ya kargehê bûye.

Li ser hejmara qurbaniyan jî Mafperwer Îqbal Mihemed diyar kir: “Karkerekî jiyana xwe ji dest da û 3 karkerên din jî birîndar bûn. Hemû jî ji welatê Nepalê ne. Birîndar ber bi nexweşxaneyê hatine veguhestin.”

Îqbal Mihemed di derbarê sedema bûyerê de jî got: “Hêtûna (kureya) ku hesinên kevin dihelîne, di dema helandina parçeyeke hesinê de di pileyeke bilind a germahiyê de teqiyeya. Tîmên taybet çûne cihê bûyerê û dest bi lêkolîna sedema teqînê kirine. Parçeyên hesinan jî ji bo lêkolînê diparêzin.”

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger