El Partî: Bila lêjneyek bêalî li Efrînê rewşa girtiyên me bişopîne
Hewlêr (Rûdaw) – Partiya Demokrat a Kurd li Sûriyê (El Partî) ragihand, heta niha 500 endam û alîgirên wê ji aliyê hêzên asayişa PYDê ve hatine girtin. El Partiyê bang li civaka navdewletî kir, lêjneyek bêalî ji Xaça Sor û Pijîşkên Bêsînor bo şopandina rewşa girtiyan wan bişînin herêma Efrînê ya rojavayê Kurdistanê.
Rêxistina Efrînê ya El Partiyê îro (27.09.2013) di daxuyaniyekê de ku li ser malpera fermî yaw ê partiyê hatiye belavkirin, ragihand, di çend rojên borî de herî kêm 500 endam û alîgirên wan li devera Efrînê ya rojavayê Kurdistanê ji aliyê hêzên asayişa PYDê ve hatine girtin.
Li gorî daxuyaniyê, beriya niha jî 30 kadroyên El Partiyê ji aliyê hêzên PYDê ve hatibûn girtin.
Di beşek din a daxuyaniya El Partiyê de, berpirsê navenda pêwendiyên El Partiyê Seîd Omer diyar kir ku PYD li hember jiyana hemû endam û alîgirên wan berpirsiyar e û wiha gotiye: “Em bang li hemû kes û aliyên şerefmend dikin ku fişerê bixin ser PYDê da ku van nêzîkbûnê xwe bide sekinandin.”
Rêxistina Efrînê ya El Partiyê her wiha bang li saziyên mafên mirov û civaka navdewletî dike ku lêjneyek bêalî ji Xaça Sor a Navdewletî û Pijîşkên Bêsnor pêk bînin û bo şopandina rewşa girtiyan bişînin devera Efrînê.
Rêxistina Efrînê ya El Partiyê duh (26.09.2013) jî ragihandibû, ji ber êşkencekirina hêzên asayişa PYDê, du encamên wan bi navê Siyamend Îbrahîm û Cêgir Hemo lal bûne.
Di heyama 2 mehên borî de zêdetirî 100 endamên El Partî, Partiya Azadî û saziyên sivîl ên rojavayê Kurdistanê ji aliyê hêzên asayişa PYDê ve hatine girtin.
PYDê ew du endamên El Partiyê bi encamdana teqînan li Efrînê tohmetbar dike lê El Partî dibêje, wan endaman di bin êşkencê û ji ber tirsa îfadeyên wisa dane û ev jî cihê baweriyê nîne.
Rewşa Rojavayê Kurdsitanê ji ber têkçûna rewşa aborî û nebûna xizmetguzariyan baş nîne. Di warê siyasî de jî di navbera PYD û ENKSê de nakokî hene. Li gorî ENKSê, PYDê bi awayekî dîktatorane û kûdetayî dest bi ser rêveberiya rojavayê Kurdistanê de girtiye û digel rêjîma Sûriyê jî hevkariyê dike.
PYD jî dibêje, wan li rojavayê Kurdistanê rêveberiyek millî ava kirine û rojava diparêzin.