Hewlêr (Rûdaw) – Lijneya Bilind a Hilbijartinan a Tirkiyeyê ragihand ku hejmara parlamenterên Dêrsima Bakurê Kurdistanê bûye 2.
Biryara Lijneya Bilind a Hilbijartinan a Tirkiyeyê ya li ser herêmên hilbijartinê û hejmara parlamenteran di Rojnameya Fermî de hat belavkirin.
Herêmên hilbijartinê û hejmara parlamenterên parêzgehan li gorî amarên şêniyan ên Saziya Amaran a Tirkiyeyê hatin diyarkirin.
Li gorî amarên nû yên nifûsê, hejmara parlamenterên Stenbolê ji 98an daket 96an.
Parlamenterekî parêzgehên Hatay û Kutahyayê kêm bû.
Herwiha li Dêrsim û li bajarên Bursa, Eskîşehîr û Bayburtê jî hejmara parlamenteran 1 zêde bû.
Li gorî biryara nû, Dêrsim dê di hilbijartinên bê de 2 kesan bişîne Parlamentoya Tirkiyeyê.
Bi tevahî 600 kursiyên Parlamentoya Tirkiyeyê hene û herî zêde ji Stenbolê (96), Enqere (36) û Îzmîrê (28) parlamenter tên hilbijartin.
Li Bakurê Kurdistanê herî zêde ji Riha (14), Dîlokê (14) û Amedê (12) parlamenter tên hilbijartin.
Herî kêm jî ji Erzinganê (2), Dêrsim (2), Kilîs (2), Îdir (2) û Erdexanê (2) parlamenter tê hilbijartin.
Ji 600 parlamenterî 130ê wan ji 25 parêzgehên Bakurê Kurdistanê tên hilbijartin.
Li hêla din, Enqere ji 2 herêmên hilbijartinê, Stenbol ji 3 herêmên hilbijartinê, Bursa ji 2 herêmên hilbijartinê û Îzmîr jî ji 2 herêmên hilbijartinê pêk tên.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse