Penaberên Rojavayê Kurdisttanê
Penaber in penaber
Wek koçera der bi der
Welat welat digerin
Bûne wek teyrê bê per...
Penaberî, ango derketina mirov ji cih warê xwe ji berê de û niha jî ji kurdan re ne xerîb bû. Li hemû aliyên Kurdistanê, nexasim di dema şer û karesatan de, kurdan ji warên xwe bar kir û berê xwe dan welatên xerîbiyê bi armanca star û parastina jiyana xwe. Bi taybetî niha kurdên Rojavayê Kurdistanê ji ber şerê ku ev nêzîka 5 sala ye li Sûriyê û Rojavayê Kurdistanê heye, bi sed hezaran kurdên rojava penaberî welatên derdorê û seranserê dinyayê bûn.
Ji bilî stran û kilamên kurdî, mijara penaberiyê di çîrok û nivîsên nivîskarên rojava de jî hatiye nîşandan. Nivîskar Reşad Şeref çend çîrok li ser mijara penaberiyê nivîsandine wek (Xewna Penaberiyê) ku tê de diyar dike çawa penaberî û hêwirîna li welatekî ewropî bûye xewna herî mezin ya kurdên rojava. Reşad di çîroka xwe de behsa jin û mêrekî kurd dike ku dev ji hemû tiştên xwe li welêt berdidin û berê xwe didin penaberiyê. Lê li wir rastî rewşên pirr xirab tên û hemû xewnên wan pûç dibin û demeke dirêj di kampeke penaberan a dûrîdest de dimînin û piştî lêpirsînê û çimkî îfadeyên herduyan ne wek hev in, ew dizanin ku mafê penaberiyê ji wan re dernakeve û divê vegerin.
Nivîskar Lewendê Dalînî ku ew bi xwe jî li Portugalê penaber e, çîroka penaberiyê dinivîse û behsa serpêhatiya her penaberekî ku sînor derbaskiriye yan jî wê rojekê derbas bike, dike. Nivîskar di çîroka xwe de behsa reva kurdên binxetê bo serxetê dike û balê dikşîne ser zehmetiyên ku di rê de dibînin û dek û dolabên qaçaxçiyan ku pirr caran ji hêla jandrmeyan tên girtin û jandrme bi hovîtî dadiberizin canê wan û hemû kîna xwe ya komkirî di serê wan de vala dikin.
Wiha xuya dike wek nivîskarê kurd Selîm Berekat dibêje, qedera her kurdekî ye ku demekê ji deman serwinda bibe û bibe penaber û xerîbê welatan…
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse