Wêne: arşîv
Hewlêr (Rûdaw) –YPJ ragiahnd hêzên wan du wesayîtên leşkerî yên artêşa Tirkiyê li gundê Hêkiçê yê ser bi Cindirêsê ve û du wesayît jî li gundê Miskê jinav birine. Artêşa Tirkiyê û çekdarên opozisyona Sûriyê yên ser bî wê jî du gund li devera Şiyê ya herêma Efrînê kontrol kirin.
Êrişa Artêşa Tirkiyê û çekdarên Artêşa Azad a Sûriyê ku Enqere piştgiriya wan dike, bo ser herêma Efrînê îro Sêşemê (27.02.2018) derbasî roja 39an bû.
Çavkaniyekê ji devera Şiyê ji Rûdawê re ragihandr ku her du gundên Sinarê û Anqelê ser bi Şiyê ve ketine destê hêzên êrîşker de û ew hêz niha gihiştine nêzîk her du gundên Hec Hesna û Bazyanayê.
Medya ser bi YPGê ve ragihand bû ku hêzên wan êrîşa artêşa Tirk û çekdarên opozisyona Sûriyê li ser her du gundan têkşikandine û 7 leşker û çekdar kuştine.
Li gundê Hêkiçê yê ser bi devera Cindirêsê ve, hêzên YPJ binkeyeke artêşa Tirkiyê kirin armanc. Li gorî medya nêzîkî YPG, di wê operasyonê de 2 wesayitên artêşa Tirkiyê hatine jinavbirin, lê ti zanyarî derbarê kuştî û birîndan de nehatine zanîn.
Her li devera Cindirêsê, helîkopterên artêşa Tirkiyê gundê Yelanqozê nêzîk bajarokê Cindirêsê kiribûn armanc û di encamê de 5 kesên sivîl bûbûn qurbanî.
Çavkaniyeke taybet ji Efrînê ji Rûdawê re da zanîn ku di êrîşa li ser Yelanqozê de, 5 şervanên Kurd jî jiyana xwe ji dest dane û 2 şervanên din bi giranî birîndar bûne û ji bo nexweşxaneya Avrîn a Efrînê hatine veguhestin.
Li devera Bilbilê, çavkaniyeke taybet ji Rûdawê re da zanîn ku hêzên YPG, şeva borî û heta sibeha îro, ji derdora gundê Bêlê cihên hêzên êrîşker li Duraqliya û derdora wê topbaran kirin.
Heman çavkaniyê diyar kir ku artêşa Tirkiyê û çekdarên opozisyonê jî derdora gundên Kotana, Qizilbaşa û bêlê ser bi Bilbilê ve û gundê Meydankê yê ser bi devera Şera ve topbaran kirine.
Li devera Şera, hêzên YPGê ragihandin, ku di êrîşeke bersivdanê de, şervanên wan gundê Omera û girê gund jî ji çekdarên opozisyonê û hêzên Tirkiyê paqij kirine û bi temamî kontrol kirine.
Li devera Reco, hêzên YPJ parçevideoyek belav kirin ku tê de du wesayîtên artêşa Tirkiyê li gundê Miskê ser bi Reco ve kirine armanc.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse