Çûna Çiyayê Gabarê 15 rojan hat qedexekirin

Hewlêr (Rûdaw) – Çûna Çiyayê Gabarê yê parêzgeha Şirnexa Bakurê Kurdistanê heta 15 rojan hat qedexekirin.

Parêzgariya Şirnexê diyar kir ku Çiyayê Gabarê ku dikeve di nav sînorên navenda bajarê Şirnexê û navçeya wê Basayê de wekî “Herêma Ewlehiya Taybet” hatiye ragihandin û çûna wî çiyayî heta 15 rojan hatiye qedexekirin.

Qedexe sibe dest pê dike û heta 10ê Kanûna Paşînê ya 2024an berdewam dike.

Parêzgariya Şirnexê di daxuyaniya xwe de îdia dike ku ew qedexe ji bo “parastina ewlehiya neteweyî, silametiya giştî, rêgiriya li ber tawanan û her pêşhateke neyînî û parastina maf û azadiya kesên din” hatiye ragihandin.

Parêzgariyê herwiha hişyarî daye welatiyan ku ji bo silametiya xwe ne bi roj û ne jî bi şev neçin Çiyayê Gabarê.

Artêşa Tirkiyeyê di van demên dawiyê de “operasyonên” xwe yên leşkerî bi hinceta gerîlayên PKKyê li ser sînorê Bakur û Başûrê Kurdistanê û çend parêzgehên din ên Bakurê Kurdistanê zêde kirine.

Di vê çarçoveyê de li Bakurê Kurdistanê bi berdewamî qedexeyên çûn û hatinê tên ragihandin.