Tûreşkên Qersê îsal bi xêr û bêr in
Hewlêr (Rûdaw) – Tûreşkên navçeya Sarîqamîşê ya parêzgeha Qersê îsal bi ber û bereketa xwe dilê xelkê xweş dikin.
Navçeya Sarîqamîşê ya Qersa Bakurê Kurdistanê yek deverên herî bilind ên welêt e.
Şêniyên herêmê îsal têra dilê xwe tûreşkan didin hev.
Mehên gulan û hezîranê li navçeyê baraneke xweş dibare.
Tûreşk ji hêla vîtamîna Cyê ve dewlemend in
Ji ber vê bereketa baranê jî tûreşkên herêmên ku bilindahiya wan digihe 2 hezar û 500 metreyî gelekî digihin.
Tûreşk, ji hêla vîtamîna Cyê ve dewlemend in hewcehiya wan bi danîna mirovan tune.
Li her cihê guncav bixwe zîl didin û ber digirin.
Ji tûreşkan herî zêde rîçal tê çêkirin.
Qersî bi armanca ku zivistanê ji vê tehma xweş bêpar nebin li nav dirî û daristanan tûreşkan didin hev.
Gulumser Demîrciyê got ku îsal tûreşk pir bibereket in û şêniyên herêmê jî têra dilê xwe didin hev.
“Rîçala wan gelekî xweş û bitehm e”
Gulumser Demîrciyê axaftina xwe wiha domand:
"Tûreşk bi xwe digihin û rîçala wan gelekî xweş û bitehm e. Îsal baran xweş barî û tûreşk bi ber û bereket bûn. Em ê rîçala wan çêkin."
Îsmaîl Kayhanogluyê ku tûreşk didan hev jî got ku li daristanê li her derê tûreşk hene.
Kayhanoglu anî zimên ku dê ew jî ji tûreşkan rîçalê çêkin û zivistanê bixwin.