Nêçîrvan Barzanî li Olîmpiyada Parîsê ye

RÛDAW

Hewlêr (Rûdaw) - Serokê Herêma Kurdistanê Nêçîrvan Barzanî gihîşt Koşka Elyseeyê û ji aliyê Serokkomarê Fransayê Emmanuel Macron hat pêşwazîkirin.

Îro êvarê li Parîsa paytexta Fransayê merasîma destpêka 33yemîn Olîmpiyadên Havînê tê lidarxistin.

Armanca serdana Nêçîrvan Barzanî ew e ku beşdarî merasîma vekirina lîstikên Olîmpiyada Parîsê ya 2024an bibe.

Li gorî daxuyaniya Serokatiya Herêma Kurdistanê, Nêçîrvan Barzanî li ser vexwandina Serokkomarê Fransayê Emmanuel Macron dê beşdarî merasîma vekirina lîstikên olîmpiyadê dibe.

Li gorî organîzatoran tê payîn ku herî kêm 120 serok û serokwezîrên welatan beşdarî merasîmê bibin.

Di dîroka olîmpiyadê da cara ewil merasima vekirinê wê li dervayî stadyûman li qiraxa çemê Seine ku di navenda Parîsê re derbas dibe bê lidarxistin.

Hinek serokên navdar ên ku beşdarî merasîma vekirina Olîmpiyada Parîsê dibin ev in:

Şahê Brîtanyayê Şah Charlesê Sêyem, Sekreterê Giştî yê Neteweyên Yekbûyî Antinio Guterres, Serokwezîrê Brîtanyayê Keir Starmer, Şêwirmendê Olaf Scholz, Serokkomarê Îtalyayê Sergio Mattarella, Serokê Îsraîlê Isaac Herzog, Mîrê Qeterê Temîm Bin Mihemed, Serokwezîrê Yunanistanê Kyriakos Mitsotakis û Xanima Yekem a Amerîkayê Jill Biden.

Biryar e demjimêr 08:30ê êvarî bi dema Hewlêrê merasîm birêve biçe û heta nîvê şevê berdewam be.

Olîmpiyadên Parîsê wê heta 16ê Tebaxa 2024an dewam bikin.