Hewlêr (Rûdaw) - Hevseroka Daîreya Pêwendiyên Derve ya Rêveberiya Xweser Îlham Ehmedê got, “Ti pêwendiya Rêveberiya Xweser bi şewitandina ofîsên ENKSyê re nîne.”
Li bajarê Qamişloyê yê Rojavayê Kurdistanê 24ê Nîsanê du ofîsên ENKSyê hatibûn şewitandin.
Hevseroka Daîreya Pêwendiyên Derve ya Rêveberiya Xweser Îlham Ehmedê li ser şewitandina ofîsên ENKSyê daxuyanî da.
Îlham Ehmedê şewitandina ofîsên ENKSyê şermezar kir.
“Divê tawanbar bîn cezakirin”
Herwiha Îlham Ehmedê diyar kir, “Herçiqasî ev bûyer tên dubarekirin, divê saziyên pêwedîdar ên Rêveberiya Xweser van bûyeran bişopînin û di vî warî de lêkolînê bikin û tawanbaran jî ceza bikin.”
Îlham Ehmedê da zanîn ku ew tohmetên li ser wan ne rast in û got:
“Tohmetbarkirina Rêveberiya Xweser bi şewitandina ofîsên ENKSyê ji rastiyê dûr e.
Ji ber ku Rêvebriya Xweser zêde hewl dide ewlehî û aramiya herêmê biparêze, herwiha hemû aliyên siyasî sûdê ji xizmetguzariyan dibînin.”
Şewitandina ofîsên ENKSyê
24ê Nîsanê, Encûmena Niştimanî ya Kurdî ya Sûriyeyê (ENKS) ragihand ku grûpeke çekdar ofîsên PDK-Syê û Partiya Yekîtiya Demokrat a Kurdistanê (PYDK) yên li Qamişloyê şewitandin.
PDK-Syê da îdia kiribû ku “çekdarên ser bi PYDyê ve ofîsa wan a Qamişloyê û Alaya Kurdistanê ya li ser banê nivîsgeha wan a Tirbespiyê şewitandine.”
25ê Nîsanê Balyozxaneya Amerîkayê ya Sûriyeyê bûyera şewitandina ofîsên ENKSyê şermezar kiribû.
Di salên borî de jî çend caran ofîsên ENKS-PDK-Syê yên li çend bajar û bajarokên Rojavayê Kurdistanê ji aliyê kesên nenas ve hatibûn şewitandin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse