Hewlêr (Rûdaw) - Parêzgariya Amedê ragihand ku derbarê îşkecekirina zarokê 14 salî yê li navçeya Licê de 1 komiser û 4 polîs bi giştî 5 kes hatine desteserkirin û her 5 kes jî ji kar hatine dûrxistin. Lê parêzgariyê mirina zarok red kir.
Li navçeya Licê ya Ameda Bakurê Kurdistanê zarokekî 14 salî di roja Newrozê de rastî îşkenceya polîsan hatibû û zarok gotibû polîsan gef lê xwarine û eger Sirûda Neteweyî ya Tirkan ji ber neke dê bê kuştin û paşê jî dest û lingên wî girêdane ew avêtine cihekî tarî.
Li ser vê yekê Baroya Amedê derbarê bûyerê de lêpirsîn dabû destpêkirin. Malbata zarok jî ji Rûdawê re axivî bû û îşkenceya polîsan a li ser kurê xwe piştrast kiribûn.
Parêzgariya Amedê roja Yekşemê 26ê Adara 2023an li ser lêpirsînê daxiyaniyek da û ragihand ku 1 komiser û 4 polîs girêdayî bûyerê ji kar hatine dûrxistin û desteserkirin. Herwiha tê gotin ku lêpirsîn berdewam e.
Serokê Baroya Amedê Nahit Eren jî heman rojê derbarê bûyerê de li ser hesabê xwe yê Twitterê peyamek belav kir û dibêje: “Girêdayî lêpirsîna 5 polîsan ya bûyera îşkenceya ser zarokê 14 salî yê li Licê, 2 polîs li navçeya Licê û 3 polîs jî ji ber li derveyê parêzgehê bûne li Enqerê hatine desteserkirin. Em proseya lêpirsînan dişopînin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse