Heêwlêr (Rûdaw) - Serokkomarê Demkî yê Sûriyeyê Ehmed Şer di Kongreya Diyaloga Niştimanî de ragihand ku ew hişyariyê didin hemû kesên ku yekîtiya Sûriyeyê dixin metirsiyê.
Ehmed Şer li Şamê di Kongreya Diyaloga Niştimanî ya Sûriyeyê de axivî û ragihand ku divê êş û zehmetiyên Sûriyeyiyan bên fêmkirin û faktorên bi pêşketina Sûriyeyê bên berçavgirtin.
Ehmed Şer behsa guhertinên li Sûriyeyê kir û got, "Dîroka Sûriyeyê di nav sedsalê de, di nav gelek astengiyan re derbas bû.
Di vê demê de Sûriyeyiyan gelek êş û zehmetî dîtin, piştî wê şoreşa pîroz a Sûriyeyê hat û serkeftineke mezin hat bidestxistin û Sûriye hat rizgarkirin."
"Em bindestiyê qebûl nakin"
Serokkomarê Sûriyeyê bang li endamên kongreyê kir û got, "Em bindestiyê qebûl nakin, Sûriyeya îro ji we dixwaze hûn li hev bikin ne ku nakokiyan ava bikin.
Sûriyeya îro ji we dixwaze hûn ji bo diyarkirina çarenûs û paşerojê danûstandinan bikin, Sûriyeya îro piştî ku ji aliyê nifşên xwe ve hatibû piştguhkirin ketiye destên xwediyên xwe."
“Sûriye parçebûnê qebûl nake”
Ehmed Şer 11ê Sibatê 2025an Komîteya Amadekar a Kongreya Diyaloga Niştimanî ya Sûriyeyê ava kir.
Serokkomarê Sûriyeyê amaje bi pirrengiya Sûriyeyê jî kir û got:
"Sûriye dibistaneke ji bo jiyana hevbeş û hemû cîhan jê fêr bûye, em di qonaxa nû avakirina dewletê de ne, komkirina çekan di destê dewletê de erk e û divê bê kirin.
Sûriye perçebûnê qebûl nake û hêza wê di yekîtiyê de ye."
Nêzîkî 600 kes beşdarî Kongreya Diyaloga Niştimanî ya Sûriyeyê bûne û ti aliyên siyasî yên Kurd ên Rojavayê Kurdistanê tevlî kongreyê nebûne.
Partiyên Rojavayê Kurdistanê diyar kir ku Kongreya Diyaloga Niştimanî ya Sûriyeyê yekalî ye û ew wê boykot dikin.
Çekdarên Heyeta Tehrîr El Şamê 8ê Kanûna Pêşîn a 2024an desthilata Beşar Esed rûxand.
Destpêka sibatê ji bo qonaxa veguhastinê hikûmeta nû ya Sûriyeyê hat damezirandin.
Ehmed Şer jî wekî serokkomarê demkî yê welêt hatibû destnîşankirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse