Nêçîrvan Barzanî spasiya Almanyayê kir ku Komkujiya Kurdên Êzidî nas kiriye

Hewlêr (Rûdaw) – Serokê Herêma Kurdistanê pêşwaziya Wezîrê Dewletê yê Almanya ji bo karûbarên derve Tobias Lindener kir û di hevdîtinê de spasiya alîkariyên Almanya bo Herêma Kurdistanê û Iraqê di şerê li dijî DAIŞê de û naskirina Komkujiya Êzidiyan weke jenosîd kir.

Serokê Herêma Kurdistanê Nêçîrvan Barzanî îro Çarşemê 25ê Çileya 2023an pêşwaziya Wezîrê Dewletê yê Almanya ji bo karûbarên derve Tobias Lindener û şandeke pê re kir.

Serokatiya Herêma Kurdistanê di daxuyaniyekê de ragihand ku di civînê de Almanyayê giringiyê daye peywendiyên xwe yên ligel Iraq û Herêma Kurdistanê û dixwaze di hemû waran de bi taybetî di warê aborî de pêwendiyên xwe ligel Bexda û Hewlêrê pêş bixe.

Di vê derbarê de Wezîrê Dewletê yê Almanya ji bo karûbarên derve Tobias Lindener amaje bi serdana dawî ya Serokwezîrê Iraqê Mihemed Şiya Sûdanî bo Almanyayê kir; her du aliyan teqezî li ser giringiya aramiya siyasî li Iraq û Herêma Kurdistanê ji bo pêşketina di hemû waran de kirin.

Nêçîrvan Barzanî her wiha spasiya alîkariyên Almanyayê bo Herêma Kurdistanê û Iraqê di şerê dijî terorîstan û DAIŞê de kir û her wiha spasiya wê yekê jî kir ku di Parlamentoya Almanyayê de komkujiya li ser Êzidiyan weke jenosîd nas kiriye.

Her du alî li ser wê yekê hevdeng bûn ku DAIŞ heta niha jî metirsiyeke rasteqîne ye bo ser asayişa Iraq û navçeyê, ji ber wê jî pêwîst e Iraq û Herêma Kurdistanê li ser erkê hevpeymaniya navdewletî ya li dijî DAIŞê berdewam bin.

Her du aliyan her wiha rewşa Herêma Kurdistanê, peywendiyên Iraqê li gel welatên cîran û navçeyê û mijarên din ên berjewendiya hevbeş gotûbêj kirin.

Serokê Herêma Kurdistanê Nêçîrvan Barzanî bi Wezîrê Dewletê yê Almanya ji bo karûbarên derve Fabius Lindener re civiya. pic.twitter.com/SDZj3Vl7zZ

— RudawKurdi (@RudawKurdi) January 25, 2023

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger