Karmendên Rêveberiya Xweser tên perwerdekirin: Dê mafên welatiyan biparêzin
Hewlêr (Rûdaw) - Li Rojavayê Kurdistanê xulên perwedekirina karmendên Rêveberiya Xweser a di warê awayê birêveberina kar û saziyan de didomin.
Hevserokê Ofîsa Rahênan û Perwerdekirinê Elî Ebdurehman anî ziman:
“Ofîsa Rahênan û Perwerdekirinê ya Herêma Bakur û Rojhilatê Sûriyeyê xula çaremîn ji bo Rêveberiya Xweser vekir. Vê xulê ji bo rahênan û perwerdekirina karmendan mehekê berdewam kir.
Karmend li ser pirsên hevserokatiyê û plandanîna stratejîk û dîwan û sîstema pêwendiyan, pirsgirêkên darayî û yasaya girêbestan hatin perwerdekirin.
Armanca vê ew e ku em karmendên Rêveberiya Xweser bi pêş bixin.”
Di vê çarçoveyê de Hevseroka Encûmena Gelan a Kantona Dêrezorê Duha Salihê behsa girîngiya Peymana Civakî kir.
Hevseroka Encûmena Gelan a Kantona Dêrezorê Duha Salihê jî got:
“Di çarçoveya Peymana Civakî de ku dê li Dêrezorê ji bo me bibe rênîşander ji karê siyasî û rêkxistina saziyên Rêveberiya Xweser re em karê xwe dikin.
Cara yekem e Dêrezor û Reqa dibin kanton, di encamê de jî çend encûmen wek encûmenên jinan û malbatên şehîdan hatin damezrandin ku mafên welatiyan bên parastin.”
Li Rojavayê Kurdistanê û herêmên Rêveberiya Xweser, piştî ku pesendkirina Peymana Civakî ya ji aliyê Encûmena Gelan ve bernameya Rêveberiyeke Xweser a nû tê danîn.