Kurdistan
Kolberên Kurd li ser sînorê navbera Rojhilat û Başûrê Kurdistanê. Wêne: Bilind T. Abdullah / Rûdaw
Hewlêr (Rûdaw) – Li ser sînorê di navbera Rojhilatê û Başûrê Kurdistanê de, di du bûyerên cuda de mîn li ser rêya kolberan teqiyan û di encamê de 4 kolber birîndar bûn.
Bûyera yekem êvara roja Duşembê 21ê Sibata 2022an li sînorê qezaya Bane ya ser bi parêzgeha Sine ya Rojhilatê Kurdistanê bûye û li devera sînorî ya Hengejal a Baneyê mînek li ser rêya kolberan teqiyaye.
Di vê bûyerê de 3 kolberên Kurd birîndar bûne.
Rêxistina Hengaw bo Mafên Mirovan nasnameya wan sê kolberên Kurd aşkere kiriye û ragihandiye, “di bûyerê de Fuad Beytûşî (24 salî), Kiyanûş Reûfî (24 salî) û Amanc birîndar bûne” û hersê kes “xelkê qezaya Serdeştê” ya ser bi parêzgeha Urmiyê ve ne.
Li gor Hengawê, ew kolber “ji lingên xwe ve birîndar bûne” û bi armanca dermankirinê bo navendên dermanî yên qezaya Baneyê hatine veguhastin.
Her heman rojê li sînorê qezaya Newsûd a ser bi parêzgeha Kirmaşanê jî mînek li ser rêya kolberan teqiyaye û di teqînê de kolberek birîndar bûye.
Nasnameya wî kolberî, Erkan Mehmûdî û 25 salî hatiye ragihandin.
Li gor raporteke rêxistina Hengawê bo Mafên Mirovan, ji destpêka îsal a zayînî ve herî kêm 6 kolber li ser sînorên Rojhilatê Kurdistanê bi sedema teqîna mînan birîndar bûne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse