Hewlêr (Rûdaw) - PAK, PSK, TDK-Tevger di daxuyaniyeke nivîskî ya hevbeş de êrîşên li ser ofîs û baregehên partî û rêxistinên Kurdî yên ser bi ENKSê ve li Rojavayê Kurdistanê û şewitandina wan ofîsan şermezar kirin û ragihandin, ev kiryar ne di berjewendî û xizmeta doza neteweyî ya miletê Kurd de ne. Her sê aliyan herwiha ji bo pêkanîna “yekîtiyeke netewî” careke din bang li ENKS û PYDê kirin.
Di çend rojên dawî de êrîşên li ser ofîsên Encûmena Niştimaniya Kurd li Sûriyê (ENKS) û partiyên ser bi vê encûmenê ve li bajar û bajarokên Rojavayê Kurdistanê zêde bûne û hejmarek ofîsên ENKSê, Partiya Demokrata Kurdistan-Sûriye (PDK-S) û Partiya Yekîtiya Kurdistanî-Sûriye (PYKS) li Dêrik, Heseke û Kobanî rastî êrîşan hatin û hatin şewitandin.
Partiya Azadiya Kurdistanê (PAK), Partiya Sosyalîst a Kurdistanê (PSK) û Tevgera Demokratîk a Kurdistanê (TDK-Tevger) di daxuyaniyeke nivîskî ya hevbeş de êrîşên li ser ofîs û baregehên ENKSê û partiyên ser bi wê encûmenê ve li Rojavayê Kurdistanê û şewitandina ofîsên wan şermezar kirin.
Her sê alî di daxuyaniya xwe de dibêjin, “Ev demek dirêj e ku li Rojavayê Kurdistanê êrîş û şewitandinên li ser baregehên partî û rêxistinên Kurdan yên ku ne bi PYD-YPG re ne û endamên ENKS ne, berdewam dikin. Ev êrîş û şewitandin, di van rojên dawî de hîn zêdetir bûne. Ev ji bo tevgera neteweyî cihê metirsî û xemgînîyek mezin e.”
PAK, PSK, TDK-Tevger diyar dikin ku ew êrîş li dijî berjewendî û doza miletê Kurd de ye û dibêjin, “Em bi awayekî pir zelal diyar dikin ku ev êrîş û şeweitandinên bargehên partî û rêxistên Kurdan, girtina endamên rêxistinên Kurdan; bi darê zorê revandina xort û keçan, ne di berjewendî û xizmeta doza neteweyî ya miletê Kurd de ye û li dijî hemû prensîbên siyasî, neteweyî, demokratîk û mirovî ne. Rê li ber lihevkirina Kurd bi Kurd re digire.”
Di daxuyaniyê de, PAK, PSK, TDK-Tevger bang li Rêveberiya Xweser dikin ku dawî li wan êrîşên nerewa bîne û êrîşkaran ceza bike û dibêjin, “Em daxwaz ji “Rêveberiya Xweser” û dezgehên asayişê dikin ku pêşiya van êrîş û binpêkirina mafên siyasî û rêxistinî bigrin; tawanbaran destnîşan bikin û cezayên pêwîst li wan bibirin; da ku êdî dawî li van êrîş û tevgerên ne rewa bê anîn.”
Her sê aliyên Kurdî yên Bakurê Kurdistanê amej bi rewşa metirsîdar û aloz a navçeyê û cîhanê kirine û tekezî li ser parastina Rojavayê Kurdistanê kirine.
Di daxuyaniyê de wiha tê gotin: “Rewşa navçeya Rojhilata Navîn û bi taybetî Rojavayê Kurdistanê gelekî aloz e. Şerê Rusya-Ukraynayê jî vê rewşa heyî aloztir dike.
Di vê rewşa taybetî û metirsîdar de, parastina Rojavayê Kurdistanê û geşkirina tevgera neteweyî li vî beşê Kurdistanê jî wezêfeyek bingehîn a her partî, rêxistin, tevgerên neteweyî, rewşenbîr û welatparêzên Kurd e. Ev jî ancax bi pêkanîna hevkarî û yekitiyên neteweyî û demokratîk mumkun e. Divê em ji bîr nekin ku hevkarî û yekîtiya nav hêzên neteweyî yên Kurdan bi awakî giştî bi siyaseta dewletên mezin yên li navçeyê ne, lihevhatî ye û ev daxwaza wan e jî.”
PAK, PSK, TDK-Tevger banga hevkarî û yekîtiyê li ENKS û PYDê dikin û dibêjin, “Em careke din bang li ENKS, YPG-PYD dikin, ku li ser “Peymana Hewlêr û Duhokê”, bi beşdariya partiyên din yên ne di nav ENKS û PYNK ne, li ser xetek neteweyî û demokratîk hevkarî û yekîtiyek berfireh pêk bînin. Grûpperestî û ezezî dijminê bidestxistina mafên neteweyî û demokratîk ê miletê Kurd e; dermanê vê nexweşiyê jî di hevkarî, yekitî û yekreziya hêzên neteweyî de derbas dibe.”
Di dawiya daxuyaniya xwe de careke din ew alî êrîş û şewitandina baregehên partî û rêxistinên siyasî şermezar dikin û destnîşan dikin, “Divê ev êrîş di cêh de bêne rawestandin, sûcdarên van kiryaran bêne eşkere kirin û cezakirin.”
Roja 18ê Nîsanê, ofîseke ENKSê û PDK-Sê li Dêrikê, roja 19ê Nîsanê ofîsa PDK-Sê li Hesekê û roja 20ê Nîsanê ofîsên ENKSê, PDK-S û PYKS li bajarê Kobaniyê hatibûn şewitandin.
Rêveberiya Xweser û Asayişa Rêveberiya Xweser heta niha derbarê şewitandina ofîsên ENKSê û partiyên ser bi wê de ti daxuyanî nedane. Herwiha heta niha ti kesek ji ber êrişên ser ofîsên ser bi ENKSê ve nehatiye desteserkirin.
ENKS û PDK-Sê, Partiya Yekîtiya Demokratîk (PYD) û grûpên ser bi wê partiyê ve, bi taybet Rêxistina Ciwanên Şoreşgêr bi şewitandina ofîsên xwe tohmetbar dikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse