Mela Ehmedê Palo di berhema xwe de xwedî felsefe û cîhanbîniyeke kûr e
Hewlêr (Rûdaw) - Mela Ehmedê Palo di warê hûnandina helbestê de xwedî şêwazeke taybet bû. Her çiqasî teşeya helbesta wî klasîk jî be, lê naveroka wê cihêreng û nûjen e. Zimanê wî bihêz, kûr û herikbar e. Wêneyên wî yên şiîrî jî cuda û balkêş in.
Bi taybetî, Ehmedê Palo di berhema xwe ya bi navê “Dewr û Gera Kurdistanê” de, bi rêya geşt û rêwîtiyeke xeyalî li her çar parçeyên Kurdistanê digere. Helbestên qeşeng li ser gund, robar, şax, çiya û bajarên Kurdistanê dinivîse. Li gelek cihan jî koka navên wan gund û bajaran şîrove û zelal dike.
Palo di berhema xwe de xwedî felsefe û cîhanbîniyeke kûr e, ku hîmê wê li ser hezkirina welat û parastina axa wî hatiye avakirin. Bi rêya hozanên xwe yên astbilind wek: Firat, Ararat, Amed, Mihabad, Mêrdîn, Cizîr û hin cihên din, Palo dixwaze peyameke giranbiha bigihîne xwîner û miletê xwe, ku ew jî çandina tovên hezkirina ax, welat û milet e. Herwiha rizgarbûn û derketina ji bin nîrên neyar û koledaran e.
Palo di dawiya berhema xwe de, bi rêya helbesta xwe ya dawî, armanca xwe ya afirandina vê berhemê, herwiha peyama xwe ya pîroz bi awayekî zelaltir tîne zimên û dibêje:
Gund bi gund û êl bi êla şar û bajarê welat
Berçem û derya û pêla berqef û koh û kelat
Ez dibînim bêheval in, der cihanê dîl û jar
Zarezar û nalenal in, bêtebat û bêhedar
Mane bin destê neyara bêcih û bêdewlet in
Dûv û destê koledara tev ji dûrî rêketin
Hê sedî min yek negotî tiştê ku dîtin welat
Can û cergê min disotî mame bêkar û xebat
Helbestvanê Kurd Mela Ehmedê Palo sala 1920an li devera Palo li Bakurê Kurdistanê ji dayik bûbû. Lê di temenekî biçûk de çûbû Rojavayê Kurdistanê û tevahiya jiyana xwe li wir derbas kiribû û di sala 1991an de li Qamişlo koça dawî kiribû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse