Li Rimêlan a Rojavayê Kurdistanê teqîn

Sîna Soma

Hewlêr (Rûdaw) – Li bajarokê Rimêlanê yê Rojavayê Kurdistanê, teqînek çêbû û li gor agahiyan, gelek ambulans û tîmên berevaniya sivîl ber bi cihê teqînê ve ketine rê.

Peyamnêrê Rûdawê li Rojavayê Kurdistanê ragihand, depoyeke çek û teqemeniyan li Rimêlanê teqiyaye.

Peyamnêrê Rûdawê diyar kir, gelek ambulans û otomobîlên agirvemirandinê berê xwe dane cihê teqînê.

Hêzên ewlehiyê jî ber bi cihê teqînê ve diçin.

Li gor agahiyan, depoya çek û teqemeniyan ku teqîn têde çêbûye, ya Hêzên Sûriyeya Demokratîk (HSD) bûye.

Hêj zirarên teqînê û sedema teqînê nehatine zanîn.

Ji ber teqînê hatinûçûna di navbera Rimêlan û Girkê Legê de hatiye qutkirin.

Her îro li nêzîkî bajarokê Ebdanê, li ser rêya di navbera bajarên Hesekê û Dêre Zorê yên Rojavayê Kurdistanê, di demjimêr 11:15an de, mînek bi tankereke sotemeniyê ve teqiya û di encamê de ajokar bi giranî birîndar bû.

Li gor zanyariyên xwecihî, nasnameya ajokarê tankerê yê birîndar Hesen Qerot e û ew ji gundê Xeresê yê ser bi bajarokê Şedadê ve ye.

Bajarokê Ebdan yê ku teqîn li nêzî wî pêkhatiye jî, 50 km dûrî bajarokê Şedadê ye.