Hewlêr (Rûdaw) - Serokê Herêma Kurdistanê Nêçîrvan Barzanî beşdarî şîna Serokkomarê Îranê Îbrahîm Reîsî dibe.
Îro Serokê Herêma Kurdistanê Nêçîrvan Barzanî li ser mirina Serokkomarê Îranê Îbrahîm Reîsî, Wezîrê Karên Derve yê Îranê Husên Emîr Abdulahiyan û berpirsên din ên Îranê çelengeke kulîlkan şand Konsulxaneya Îranê ya Hewlêrê û peyamek belav kir.
Di peyama xwe de Nêçîrvan Barzanî got: “Ji bo mirina xemnak a Serok Reîsî û şandeya wî, hevxemî û hevsoziya serkirdayetî û hikûmet û gelê Komara Îslamî ya Îranê yê dostê min in.”
Nêçîrvan Barzanî 5ê Gulanê çûbû Tehranê û li wê derê bi Serokkomarê Îranê Îbrahîm Reîsî, Rêberê Îslamî yê Îranê Elî Xamineyî û Wezîrê Karên Derve yê Îranê Husên Emîr Abdulahiyan û Serokê Parlamentoya Îranê Mihemed Baqir Qalîbaf re civiya bû.
13ê Gulanê Berdevkê Wezareta Karên Derve ya Îranê Nasir Kenanî behsa civîna Nêçîrvan Barzanî ya bi berpirsên Îranê re kir.
Nasir Kenanî eşkere kiribû ku gotûbêjên zelal di navbera berpirsên Îranê û Serokê Herêma Kurdistana Îraqê de hatine kirin û ew gotûbêj erênî bûne û ew hêvî dikin bandorên wan ên erênî bibinîn.
Berdevkê Serokatiya Herêma Kurdistanê Dilşad Şehab ji Rûdawê re ragihand ku Nêçîrvan Barzanî bi serokatiya şandeyeke bilind beşdarî şîna Serokkomarê Îranê dibe.
Çi bûbû?
Îbrahîm Reîsî û Serokkomarê Azerbaycanê Îlham Aliyev 19ê vê mehê li ser sînorê Îranê û Azerbeycanê bi merasîmeke fermî bendavek vekiribû.
Piştî merasîmê di rêya vegerê de helîkoptera Serokkomarê Îranê Îbrahîm Reîsî li herêma Culfayê ya Tewrêzê ketibû.
Ji ber şer û mercên xerab ên hewayê karên lêgerînê bi zehmetî dihatin kirin.
Enqaza helîkopterê doh (piştî ketina wê 15 saetan) bi dronan hat tesbîtkirin û derket holê ku li cihê enqaza helîkopterê ti nîşaneyên jiyanê nînin.
Televîzyona dewletê ya Îranê ragihand ku kes ji qezayê bi saxîtî nefiliye.
Kî û kî mirine?
Piştre hat ragihandin ku Serokkomarê Îranê Îbrahîm Reîsî, Wezîrê Karên Derve yê Îranê Husên Emîr Abdulahiyan, Melayê Înê yê Tewrêzê Ayetulah El Haşim û Parêzgarê Azerbeycana Rojhilat Melîk Rehmetî canê xwe ji dest daye.
Li hêla din 2 rayedarên leşkerî yên pilebilind ên Supaya Pasdaran û 3 muretebat jî di heman helîkopterê de mirine.
