Hewlêr (Rûdaw) – Rêveberiya Parastina Sivîlan a Hewlêrê ragihand ku ji ber lehiyê av ketiye hinek malan û wan ji bo çareserkirina pirsgirêkê tîmên xwe şandine.
Doh bi şev li Herêma Kurdistanê baraneke gur bariya û îro derket holê ku li parêzgehên Hewlêr û Dihokê bandoreke wê ya mezin hebûye û li hinek cihan asta avê bilind bû.
Berdevkê Rêveberiya Parastina Sivîlan a Hewlêrê Karwan Mîrawdelî ji Rûdawê re ragihand:
“Derengiya şevê av çû nav du malên Şawêsê lê zerer zêde nebû û me tîm rasterast şandin cihê bûyerê.
Îro li Behirkê jî av çû nav çend malan û tîmên me rasterast çûn cihê bûyerê.”
Berdevkê Rêveberiya Parastina Sivîlan a Hewlêrê Karwan Mîrawdelî herwiha anî ziman:
“Li gelek cihan av rawestiyabû. Doh Cadeya 60 Metrî û îro jî çend cadeyên din di bin avê de mabûn lê her tişt çareser bûye û niha ti pirsgirêk nemane.”
Li Silêmaniyê lehî ranebûye
Li navenda bajarê Silêmaniyê 11 baregehên Parastina Sivîlan hene û hemû jî di amadebaşiyê de ne.
Rêveberê beşa kanalîzasyonê ya Şaredariya Silêmaniyê Mehmûd Mihemed ji Rûdawê re got:
“Li ti cihan lehî ranebûye û eger pirsgirêk hebin jî hewl hatiye dayîn demildest bê çareserkirin û hemû dezgehên Şaredariya Silêmaniyê di amadebaşiyê de ne.
Hemû tîm li kolanan in da ku rasterast pirsgirêkan çareser bikin.”
Mehmûd Mihemed got:
“Hemû pirsgirêkên ku par hebûn hatin çareserkirin û proje hatin bicihkirin. Ev 2 roj in baran dibare û ti pirsgirêk li ti cihan derneketine.”
Rêveberê beşa kanalîzasyonê ya Şaredariya Silêmaniyê dibêje, hemû kanalîzasyon ji bo werza baranê ya îsal hatine pakkirin û amadekirin.
Li parêzgeha Helebçeyê û Îdareya Serbixwe ya Zaxoyê barana gur berdewam e û metirsiya rabûna lehiyê heye.
Lehiyê #Hewlêr da ber xwe
— RudawKurdi (@RudawKurdi) November 20, 2023
Av heta nav malan çû û rê di bin avê de man
📸 Helebçe Sadûn - Rûdaw pic.twitter.com/nLkbYnhnIM
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse