Hewlêr (Rûdaw) - El-Partiyê di daxuyaniyekê de ragihandiye ji 18ê Adara 2018an heta niha li Efrînê 370 sivîl hatine kuştin.
Partiya Demokrat a Kurd ya Sûriyeyê (El-Partî) îro di daxuyaniyekê de ragihand ji destpêka dagîrkirina Efrînê ve heta niha 370 welatiyên sivîl li herêma Efrînê hatine kuştin.
El-Partiyê di daxuyaniya xwe de got, "Ji 18ê Adara 2018an û heta 16ê Adara 2024an bêtir ji 370 welatiyên Kurd, li herêma Efrînê li ser destên komên çekdar ên girêdayî Îtîlafa Mixalefeta Sûriyeyê hatine kuştin."
Di berdewamiya daxuyaniyê de El-Partiyê wiha anî ziman, "Ew welatî li ser destên erebên hawirde û di bin şkenceyan de li zindanên grûpên terorîst ku bi navê Artêşa Niştimanî ya Azad têne naskirin, hatine kuştin."
Di beşeke din a daxuyaniyê jî de El-Partiyê da zanîn ku di nav kuştiyan de, 64 zarok û 50 jin hene ku bi nav hatine belgekirin.
Dagirkirina Efrînê
Grûpên Çekdar ên mixalefeta Sûriyeyê bi alîkariya Tirkiyeyê 20ê Kanûna Paşîna 2018an êrişî Efrînê kir.
Şer û pevçûnan 58 rojan dewam kir Tirkiyeyê û grûpên çekdar Efrin di 18ê Adara 2018an de dagir kir.
Di van 6 salan de li Efrînê binpêkirinên mezin ên wekî talankirin, kuştin û guhertina demografiyê ji aliyê grûpên çekdar ên ser bi Tirkiyeyê ve hatin kirin.
Di encama êrişên giran û dagirkirinê de bi sed hezaran Kurd ji mal û milkên xwe bûn û ketin ser rê û dirbên koçberiyê.
Tevî ku Neteweyên Yekbûyî, rêxistinên pêwendîdar û aliyên siyasî yên Kurdî vê dagirkeriyê protesto dikin jî dagirkerî û tawanên hovane yên li dijî Kurdên Efrînê berdewam dikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse