MÊRDÎN - Koşka 400 salî kir mûzexane: Mehane 25 hezar geştyar li deriyê wê dixin
Hewlêr (Rûdaw) – Li parêzgeha Mêrdînê ya Bakurê Kurdistanê ya ku wek landika şaristanî, ol, çand û zimanan deng vedaye kesekî koşkek kiriye mûzexane.
Serokê Komeleya Geştyarî û Otelvanên Mêrdînê ji bo danasîna Mêrdîna kevnar di bin banê avahiyekê de hizra vekirina mûzexaneyekê kir.
Piştî hewldanên 4 salan wî li navçeya Artukluyê koşkeke dîrokî ji bo xeyala xwe peyda kir.
Piştre koşk nûjen kir û ev salek e wek mûzexane deriyê wê ji geştiyaran re vekiriye.
Serokê Komeleya Geştyarî û Otelvanên Mêrdînê Ozgur Gurgor got:
“Çar malbat di vê koşkê de diman. Derdora 400 sal berê ji aliyê malbateke Macar ve hatiye avakirin. Me piştre ev der nûjen kir û kir mûzexaneya çand û hunerê ya Mêrdînê.
Dema me serî li wezaretê jî da wan jî got ev avahî guncav e û me wek mûzexaneya çand û hunerê ya Mêrdînê vekir.”
Koşka dîrokî ji 2 qatan pêk tê. Niha li her du qatan 7 ode çalak in û danasîna çand û hunera Mêrdînê dikin.
Li qata yekem atolyeyên têlkarî yan jî xemilandin û neqişandina zîv û sifrê hatine danîn ku du pîşeyên kevnar û karên destî yên parêzgehê ne.
Sê hostayên Kurd, Siryan û Ereb bi hev re li van atolyeyan hunera xwe pêşkêşî geştyaran dikin.
“Zehmet e û sebrê dixwaze”
Hostayê Têlkariyê Metîn Bayrug got:
“Em nîşanî geştyaran didin ku pîşeya têlkariyê çawa tê kirin. Hunereke zehmet e û sebrê dixwaze.”
Hostayê sifrê Cîhat Ozcan jî li ser hunera xwe got:
“Pîşeya sifrê pîşeya bav û kalan e. Ev 55 sal in ez vî karî dikim. Pîşeya sifrê ber bi nemanê ve diçe û ti kes vî karî nake. Em jî hewl didin vê pîşeyê zindî bihêlin.”
Mûzexane derfeteke baş dide geştyaran ku hemû taybetmendiyên çand û hunera Mêrdînê bi hev re li cihekî bibînin.
Geştiyareke bi navê Yagmur Polat anî ziman:
“Cihekî gelekî xweş e. Ew çandên ku ji demên berê mane li vê derê berdewamî bi wan tê dayîn.
Gelekî baş e û ez gelekî kêfxweş bûm. Gelek zanyarî hebûn ku min nedizanîn.”
Mûzexaneya çand û hunerê tevî ku saleke hatiye vekirin pêşwazî li derdora 300 hezar kesî kiriye.
Berpirsên mûzexaneyê dibêjin mehane nêzîkî 25 hezar geştyar li deriyê wan didin.