Li Colemêrgê qedexeya çalakiyan hat ragihandin
Hewlêr (Rûdaw) - Li Colemêrgê qedexeya meş, xwepêşandan, civînên çapemeniyê, grev, vedana konan û çalakiyên rûniştinê 7 rojan hatin qedexekirin.
Li parêzgehên Bakurê Kurdistanê dawî li qedexeyên bi hincetên cuda nayê.
Li parêzgeha Colemêrgê qedexeya ku ji sala 2016an ve berdewam e careke din 7 rojan hat dirêjkirin.
Li gor daxuyaniya ku Parêzgariya Colemêrgê belav kiriye, ji 17ê Îlonê heta 23yê Îlonê, 7 rojan hemû çalakiyên wekî xwepêşandan, meş, grev, vedana kon û standan û çalakiyên wiha li wê parêzgehê qedexe ne.
Di daxuyaniyê de hat îdiakirin ku bi armanca "yekparçeyiya dewlet û netewe, binpênekirina maf û azadiyên kesên din, asayîşa xelkê û anîna aramiyê, rêgiriya tawanan, parastina maf û azadiyên xelkê" biryara qedexekirina xwepêşandan û çalakiyan hatiye dayîn.
Li gorî daxuyaniyê, biryara qedexekirinê çalakiyên fermî li xwe nagire ku ji aliyê parêzgar û qeymeqaman ve destûr hatiye dayîn.